Presidenti i SHBA-së, Donald Trump, gjatë një fjalimi në Memphis të Tenesit, ku pritet të flasë për luftën kundër krimit, dha edhe një përditësim të shkurtër për luftën me Iranin, duke deklaruar se Uashingtoni po përpiqet të kuptojë nëse mund të arrihet një marrëveshje më e gjerë me Teheranin.
“Gjithë jetën time kam negociuar, por me Iranin kemi negociuar prej shumë kohësh. Këtë herë duket se e kanë seriozisht,” tha Trump, duke shtuar se beson se Irani ka pranuar se nuk do të ketë armë bërthamore.
Trump deklaroi gjithashtu se një pjesë e konsiderueshme e udhëheqjes iraniane është vrarë që nga fillimi i luftës dhe paralajmëroi se Irani ka “edhe një shans” për të arritur paqen.
“Shpresojmë që ta shfrytëzojnë këtë mundësi. Në çdo rast, Amerika dhe gjithë bota do të jenë shumë më të sigurta dhe planeti do të jetë më i sigurt,” tha ai.
Megjithatë, nga ana tjetër, kryetari i parlamentit iranian, Mohammad-Bagher Ghalibaf, ka mohuar se ka negociata me SHBA-në, duke i quajtur deklaratat për bisedime “lajme të rreme”.
