Tom Homan, i ashtuquajturi “car i kufirit” i SHBA-së, njoftoi se do të përfundojë operacioni për përforcimin e njësive federale kundër emigracionit në shtetin e Minesotës, pasi sipas tij, presidenti Donald Trump ka miratuar kërkesën për mbylljen e operacionit.
“Do të qëndroj edhe pak në Minesota për të mbikëqyrur tërheqjen dhe për të siguruar që ajo të realizohet me sukses”, deklaroi Homan gjatë një konference për shtyp të enjten në mëngjes.
Gjatë këtij viti, Trump dislokoi mijëra agjentë të armatosur brenda dhe përreth qytetit të Mineapolisit, një veprim që shkaktoi protesta të forta. Homan tha se Minesota është bërë “më pak një shtet-strehë” për emigrantët e paligjshëm, duke theksuar se bashkëpunimi i autoriteteve lokale me zyrtarët federalë të emigracionit është rritur ndjeshëm.
Njoftimi vjen pas vrasjes me armë zjarri të dy shtetasve amerikanë nga agjentë federalë të emigracionit, në një kohë kur numri i personelit në shtet kishte tejkaluar 2 mijë persona. Një javë më parë, administrata Trump kishte paralajmëruar se do të reduktonte me 700 numrin e agjentëve federalë në Minesota.
Homan theksoi se tërheqja e pjesshme po bëhet për shkak të bashkëpunimit “të paprecedentë” nga sherifët e zgjedhur në nivel qarku, të cilët administrojnë burgjet lokale.
Megjithatë, ai nënvizoi se politika e deportimeve masive do të vijojë. “Presidenti Trump është plotësisht i vendosur të realizojë deportime masive gjatë këtij mandati dhe zbatimi i ligjit të emigracionit do të vazhdojë çdo ditë në të gjithë vendin. Presidenti Trump ka bërë një premtim dhe nuk kemi marrë asnjë udhëzim për të kundërtën”, deklaroi Homan.
