Presidenti i SHBA-së, Donald Trump, ka prezantuar të ashtuquajturin “Bordi i Paqes”, një organ i ri për zgjidhjen e konflikteve ndërkombëtare, me një tarifë prej 1 miliard dollarësh për anëtarësim të përhershëm.
Ndërkohë që në Davos flitet për paqe, plane dhe investime, situata në Gaza vijon të përkeqësohet. Burime mjekësore nga Spitali Al-Shifa raportojnë se të paktën katër persona janë vrarë nga zjarri izraelit, ndërsa një foshnjë ka humbur jetën nga i ftohti, në kushtet e një krize humanitare gjithnjë e më të rëndë.
Reagimet nga palestinezët ndaj Bordit të Paqes janë thellësisht skeptike. Manal al-Qouqa, një nënë e zhvendosur në Gaza, tha se “ky këshill i ashtuquajtur i paqes nuk ekziston në realitet”, duke shtuar se çdo nismë e re ndërkombëtare vetëm sa e shton vuajtjen e popullit palestinez.
“Çfarë paqeje flasin, kur në terren nuk ka as paqe dhe as siguri? Po jetojmë një tragjedi reale, një Nakba moderne,” u shpreh ajo.
Edhe Suhail al-Hanawi, një tjetër palestinez i zhvendosur, deklaroi se Trump dhe Netanyahu janë ndër aktorët që qëndrojnë pas konflikteve globale, duke theksuar se për njerëzit në kampet e zhvendosurve Bordi i Paqes nuk ka sjellë asnjë ndryshim real apo lehtësim të vuajtjes.
Në të njëjtën kohë, kritikat janë shtuar edhe ndaj mënyrës se si Gaza u paraqit në Davos. Sipas vëzhguesve, ajo që u shfaq ishte një imazh i pastruar, kozmetik dhe i shkëputur nga realiteti, ku Gaza u trajtua më shumë si një projekt i ardhshëm investimi sesa si një vend që ka nevojë urgjente për ndihmë humanitare.
“Posterat e shndritshëm e paraqesin Gazën si një mundësi biznesi, jo si një vend ku njerëzit po vriten, po vdesin nga uria dhe po zhvendosen çdo ditë,” thuhet në reagime, duke paralajmëruar se rreziku qëndron në normalizimin e tragjedisë dhe zhdukjen e dimensionit njerëzor të krizës.
Sipas kritikëve, Gaza po diskutohet si një faqe planifikimi dhe investimi, jo si një territor ku njerëzit po vdesin çdo ditë, ndërsa zhvendosja masive, uria, varfëria ekstreme dhe vuajtja po mbeten në plan të dytë.
Në thelb, kritika është e qartë: Gaza nuk ka nevojë për marketing dhe plane të ardhshme zhvillimi, por për ndalim të dhunës, mbrojtje të civilëve dhe ndihmë urgjente për mbijetesë.
