Presidenti amerikan Donald Trump ka kritikuar ashpër aleatët e Shteteve të Bashkuara pasi disa prej tyre refuzuan kërkesën e Uashingtonit për ndihmë në patrullimin e ngushticës strategjike të Hormuzit.
“Kam qenë gjithmonë një kritik i fortë i kësaj politike të mbrojtjes së vendeve të tjera, sepse e di që jemi ne ata që i mbrojmë dhe, nëse ndonjëherë do të kishim nevojë për ndihmë, ata nuk janë aty. Këtë e di prej shumë kohësh”, deklaroi Trump.
Kreu i Shtëpisë së Bardhë u ankua se disa vende aleate, të cilat sipas tij kanë përfituar për dekada nga mbështetja amerikane në fushën e sigurisë, nuk kanë treguar besnikëri të mjaftueshme ndaj SHBA-së në momentin kur Uashingtoni kërkoi mbështetje për operacionet në ngushticën e Hormuzit.
Trump nuk përmendi emra konkretë, por theksoi se disa prej partnerëve tradicionalë të Amerikës kanë refuzuar të përfshihen në përpjekjet për të garantuar sigurinë në këtë korridor detar jetik për tregtinë globale të naftës.
Deklarata e tij vjen ndërsa lufta në Lindjen e Mesme ka hyrë në javën e tretë dhe tensionet në rajon vazhdojnë të rriten, duke shtuar frikën për një përshkallëzim edhe më të gjerë të konfliktit.
