WASHINGTON, 25 shtator (Reuters) – Presidenti i SHBA, Donald Trump, ka firmosur një urdhër ekzekutiv që parashikon shitjen e operacioneve amerikane të TikTok tek investitorë amerikanë dhe globalë, duke e konsideruar këtë si zgjidhje për kërkesat e sigurisë kombëtare të përcaktuara në ligjin e vitit 2024.
Sipas zëvendëspresidentit JD Vance, kompania e re amerikane do të vlerësohet rreth 14 miliardë dollarë, shumë më e ulët nga parashikimet e disa analistëve. Trump ka shtyrë deri më 20 janar zbatimin e ndalimit të aplikacionit nëse pronarët kinezë nuk e shesin, për t’i dhënë kohë procesit të ndarjes nga platforma globale dhe sigurimit të investitorëve.
Një nga pikat më të ndjeshme mbetet algoritmi i rekomandimeve të TikTok-ut, i cili do të “trajnohet sërish dhe do të monitorohet nga partnerë të sigurisë amerikane”, sipas urdhrit.
Trump tha se kishte folur me presidentin kinez Xi Jinping, i cili i kishte dhënë miratimin për planet. Ndërkohë, ministria e jashtme e Kinës deklaroi se respekton vullnetin e kompanive dhe pret që SHBA të ofrojë një ambient të hapur e jo diskriminues për bizneset kineze.
TikTok, që ka 170 milionë përdorues në SHBA, nuk ka komentuar ende vendimin. Trump ka pranuar publikisht se platforma ka ndihmuar në fitoren e tij elektorale vitin e kaluar, ndërsa llogaria e tij personale numëron rreth 15 milionë ndjekës.
