Presidenti amerikan Donald Trump deklaroi se Europa nuk i tregon se si të veprojë ndaj presidentit rus, Vladimir Putin. Deklarata e tij erdhi dy orë para takimit të planifikuar me Putinin në Anchorage të Alaskës.
Dy ditë më parë, Trump zhvilloi biseda telefonike me liderët europianë për të diskutuar pritshmëritë e tyre para samitit. Sipas tyre, Ukraina duhet të përfshihet në çdo negociatë, me qëllim një proces trilateral që përfshin edhe presidentin ukrainas Volodymyr Zelensky. Ata theksuan se Ukraina mund të diskutojë çështje territoriale vetëm nëse ndalet avancimi i frontit dhe pa njohjen e pushtimit rus.
Liderët europianë nënvizuan gjithashtu rëndësinë e koordinimit mes SHBA-së dhe Evropës në negociatat me Rusinë, si dhe domosdoshmërinë e vazhdimit të presionit përmes sanksioneve, ndërsa Bashkimi Europian po përgatit paketën e 19-të të masave kundër Moskës.
