Presidenti i SHBA, Donald Trump dhe kryeministri izraelit, Benjamin Netanyahu, mbajtën një konferencë të përbashkët për shtyp ku shpallën një propozim me 20 pika mbi të ardhmen e Gazës.
Trump u bëri thirrje Hamasit që të pranojë kushtet e planit, duke shprehur besim se grupi do t’i pranojë ato. Nga ana tjetër, Netanyahu paralajmëroi se nëse Hamasi refuzon ose tërhiqet nga marrëveshja, “Izraeli do ta përfundojë punën vetëm”. Sipas tij, plani ofron një rrugë “realiste” përpara në Gaza dhe “përmbush objektivat e luftës” së Izraelit.
Netanyahu bëri të ditur se tërheqja e Izraelit nga Gaza do të jetë graduale dhe do të lidhet drejtpërdrejt me nivelin e çarmatosjes së Hamasit. Ai dhe Trump konfirmuan krijimin e një organi të ri ndërkombëtar mbikëqyrës, ngritjen e një qeverie të udhëhequr nga palestinezët dhe ndalimin e luftimeve në Gaza.
Ndërkohë, një zyrtar i Hamasit, Mahmoud Mardawi, deklaroi për Al Jazeera se grupi nuk ka marrë ende planin e shkruar të Trump për paqen në Gaza. Ai theksoi se nuk i është dorëzuar asnjë dokument zyrtar, pavarësisht konferencës së përbashkët të presidentit amerikan dhe kryeministrit izraelit.
