Presidenti amerikan, Donald Trump njoftoi të premten nëpërmjet se asnjë zyrtar amerikan nuk do të marrë pjesë në samitin e ardhshëm të G20-ës në Afrikën e Jugut këtë muaj, ku SHBA-të pritej të përfaqësoheshin nga zëvendëspresidenti J.D. Vance.
“Është një skandal që G20 po mbahet në Afrikën e Jugut”, tha presidenti, duke shtuar: “Asnjë zyrtar i qeverisë amerikane nuk do të marrë pjesë ndërsa shkeljet e të drejtave të njeriut atje vazhdojnë.”
Një burim i Reuters i njohur me çështjen konfirmoi se Vance nuk pritet më të udhëtojë në Afrikën e Jugut për këtë samit.
“ ‘Afrikanerët’ (njerëz me prejardhje nga kolonët holandezë dhe gjithashtu emigrantë francezë dhe gjermanë) po vriten dhe masakrohen dhe tokat dhe fermat e tyre po konfiskohen ilegalisht”, shkroi Trump në Truth Social..
Trump kishte deklaruar vazhdimisht se nuk kishte asnjë mënyrë që ai personalisht të shkonte në Afrikën e Jugut, duke përmendur mosmarrëveshjet e tij me politikën e qeverisë së homologut të tij Cyril Ramaphosa në lidhje me pronësinë e tokës, si dhe qëndrimet e tij ndaj Izraelit.
Në maj, gjatë një takimi në Zyrën Ovale, presidenti amerikan akuzoi se një “gjenocid” po kryhej kundër pronarëve të bardhë të tokave në Afrikën e Jugut.
Qeveria dhe ekspertët e Afrikës së Jugut po hedhin poshtë pretendimet e qeverisë amerikane për një “gjenocid” të supozuar, të cilin ata e përshkruajnë si një “teori konspiracioni” që qarkullon “në qarqet e ekstremit të djathtë”.
Më parë këtë vit, SHBA-të mirëpritën një grup të parë të afrikanojugorëve të bardhë, të cilëve u dhanë azil. Në fillim të shkurtit, Presidenti Trump ngriu ndihmën për Afrikën e Jugut dhe në mars, administrata e tij dëboi ambasadorin e vendit nga Uashingtoni.
