Detaje të reja kanë dalë në dritë pas shpërthimit katastrofik në fabrikën e biskotave Violanta në Trikala, ku humbën jetën pesë gra. Sipas hetuesve, viktimat u gjetën nën rrënojat e çatisë së shembur të repartit të prodhimit.
Autoritetet theksojnë se bilanci i viktimave mund të kishte qenë edhe më i rëndë, pasi nga 13 punonjësit e turnit të natës, shumë prej tyre shpëtuan vetëm sepse ndodheshin në pushim jashtë godinës ose pranë daljeve në momentin e shpërthimit. Gjithashtu, atë natë kishte më pak punonjës se zakonisht, për shkak të ceremonisë vjetore të prerjes së “Vasilopitës” (tortës së Vitit të Ri), e zhvilluar vetëm disa orë më parë.
Në një detaj tronditës, televizioni grek Star publikoi fotografinë e fundit të tre prej viktimave, ku ato shihen duke buzëqeshur dhe përqafuar njëra-tjetrën gjatë festës, pa e ditur se pak orë më vonë do të humbnin jetën gjatë turnit të punës.
Banorë të Trikalas dhe familjarë të viktimave tregojnë se shumë nëna me fëmijë të vegjël preferonin turnin e natës, për të qenë pranë fëmijëve gjatë ditës. “Zgjidhnin të punonin natën që të ishin në shtëpi ditën me fëmijët,” tha një e njohur e tyre.
Shkaku i mundshëm: rrjedhje gazi
Ekipet e shpëtimit të EMAK-ut punuan për orë të tëra mes rrënojave për nxjerrjen e trupave. Hetimin e ka marrë përsipër Drejtoria e Zjarreve dhe Krimeve (DAEE), e cila në gjetjet paraprake dyshon për një rrjedhje gazi nga furrat industriale. Po ashtu, ekspertët po hetojnë edhe mundësinë e një “shpërthimi pluhuri” nga lëndë të para si mielli apo sheqeri i imët. Autoritetet kanë përjashtuar sabotazhin.
Ngjarja e rëndë ndodh në një moment rritjeje të jashtëzakonshme për kompaninë Violanta. E themeluar në vitin 2003, ajo është shndërruar nga një furrë lokale në një eksportues ndërkombëtar, me shitje vjetore që i afrohen 45 milionë eurove.
