Një foshnjë vetëm 11 muajshe ka humbur jetën në Torino pasi dyshohet se u mbyt nga një kafshatë ushqimi.
Ngjarja ndodhi rreth orës 20:30 të mbrëmjes së djeshme në lagjen Parella. “Nxitoni, nipi im po mbytet”, ka thirrur e dëshpëruar tezja e foshnjës kur telefonoi shërbimin e emergjencës 118. Brenda pak minutash në vendngjarje mbërritën dy ambulanca.
Ekipet e shpëtimit u përpoqën ta reanimojnë vogëlushin për rreth 25 minuta, edhe gjatë transportit drejt urgjencës së spitalit Maria Vittoria. Foshnja, me origjinë nigeriane, mbërriti në spital në arrest kardiak. Në të njëjtin spital ndodhej e shtruar edhe nëna e tij, e cila është shtatzënë dhe pranë lindjes.
Pavarësisht përpjekjeve të mjekëve, foshnja nuk arriti të mbijetojë. Sipas të dhënave të para, dyshohet se ai është mbytur nga një kafshatë, por për të sqaruar plotësisht shkaqet do të kryhen autopsia dhe hetime të tjera mjeko-ligjore.
Në spital mbërriti edhe policia, ndërsa pritet që prokuroria të hapë një hetim për të zbardhur plotësisht rrethanat e kësaj tragjedie.
