Të paktën 30 palestinezë u vranë dhe rreth 300 të tjerë u plagosën nga zjarri izraelit në veri të Gazës të mërkurën, sipas Ministrisë së Mbrojtjes Civile të drejtuar nga Hamasi. Sipas AFP, drejtori i spitalit al-Shifa, Mohammed Abu Salmiya, tha se kanë pranuar 35 trupa, ndërsa burime të tjera flasin për 48 të vrarë.
Forcat izraelite (IDF) deklaruan se kishin qëlluar vetëm “plumba paralajmërues”, por thanë se po hetojnë ngjarjen dhe “nuk janë në dijeni për viktima nga ana e tyre”.
Ndërkohë, burime spitalore në Gaza thanë për BBC se gjashtë palestinezë u vranë pranë një qendre shpërndarjeje ndihmash në Rafah, por Fondacioni Humanitar i Gazës e mohoi këtë.
OKB njoftoi se që nga fundi i majit, mbi 1,000 palestinezë janë vrarë nga ushtria izraelite ndërsa përpiqeshin të merrnin ushqime. Mbi 150 persona, përfshirë 89 fëmijë, kanë vdekur nga uria.
Ekspertë të sigurisë ushqimore të mbështetur nga OKB paralajmërojnë se “skenari më i keq i urisë po realizohet aktualisht” në Gaza. Sekretari i Përgjithshëm i OKB, António Guterres, deklaroi se “rrjedha e ndihmave duhet të bëhet si oqean”, duke i bërë thirrje Izraelit të heqë çdo pengesë.
Ndërkohë, emisari i SHBA për krizën humanitare, Steve Witkoff, do të vizitojë Izraelin këtë javë. Kjo ndodh ndërsa Kanadaja, pas Britanisë dhe Francës, shpalli planet për të njohur shtetin palestinez në shtator në OKB.
Sipas ministrisë së Shëndetësisë në Gaza, mbi 60,000 palestinezë janë vrarë që nga tetori 2023, mes tyre gati 19,000 fëmijë dhe afro 10,000 gra. Ofensiva izraelite filloi pas sulmit të Hamasit ndaj jugut të Izraelit më 7 tetor, ku u vranë rreth 1,200 persona dhe u morën peng 251 të tjerë.
