Kryeministri britanik Keir Starmer ishte paralajmëruar paraprakisht se marrëdhënia e Peter Mandelson me financierin e dënuar për krime seksuale Jeffrey Epstein përbënte një rrezik serioz për reputacionin e qeverisë britanike, përpara se Mandelson të emërohej ambasador i Mbretërisë së Bashkuar në Shtetet e Bashkuara.
Sipas një raporti të përgatitur nga ekipi i Starmer në dhjetor 2024, zyrtarët kishin përmbledhur informacionet publike mbi lidhjet e Mandelson me Epstein, i cili ishte dënuar për herë të parë në vitin 2008 për krime seksuale. Dokumenti theksonte se marrëdhënia mes tyre kishte vazhduar edhe pas këtij dënimi.
Raporti evidentonte se kontaktet mes dy personave vijuan gjatë viteve 2009–2011. Në dokument përmendet gjithashtu se Mandelson thuhet se kishte qëndruar në shtëpinë e Epstein në qershor të vitit 2009, në një kohë kur ky i fundit ndodhej në burg.
Emërimi i Mandelson si ambasador në SHBA shkaktoi kritika dhe reagime të forta politike. Megjithëse lidhjet e tij me Epstein ishin të njohura publikisht prej vitesh, dokumentet e publikuara nga Departamenti i Drejtësisë i Shteteve të Bashkuara sollën prova të reja mbi thellësinë dhe kohëzgjatjen e marrëdhënies mes tyre, e cila sipas të dhënave kishte vazhduar edhe pas dënimit të Epstein në vitin 2008.
Në shtator, Starmer vendosi të shkarkojë Mandelson nga detyra, pas publikimit të një serie dokumentesh nga autoritetet amerikane. Publikimi i një tjetër grupi dosjesh në janar shkaktoi reagime të reja publike, duke shtuar presionin ndaj qeverisë laburiste për të sqaruar se çfarë dinte në momentin e emërimit të tij.
Dokumentet e verifikimit i referohen gjithashtu një raporti të vitit 2019 të porositur nga JPMorgan Chase, i cili citon të dhëna personale të Epstein dhe tregon se marrëdhënia mes tij dhe Mandelson kishte nisur që në vitin 2002 dhe kishte vazhduar gjatë gjithë viteve 2000. Në raportin e dorëzuar Starmer theksohej se kjo përbënte një “rrezik të përgjithshëm reputacional”.
Dosjet zbulojnë gjithashtu se këshilltari për sigurinë kombëtare i Starmer, Jonathan Powell, e kishte konsideruar emërimin e Mandelson si “të pazakontë”. Në një bisedë telefonike me avokatin e kryeministrit pas shkarkimit të Mandelson, Powell kishte shprehur shqetësime për reputacionin e tij si bashkëpunëtor i afërt i kryeministrit dhe kishte theksuar se procesi i emërimit i dukej “çuditërisht i nxituar”.
Një tjetër dokument në dosje tregon se avokatët e Mandelson kishin kërkuar pagesën e pjesës së mbetur të kontratës katërvjeçare si ambasador, që arrinte në 547,201 paund (rreth 730 mijë dollarë). Në përfundim, atij iu paguan vetëm 75,000 paund, rreth 100 mijë dollarë.
Muajin e kaluar, policia britanike arrestoi Mandelson nën dyshimin për shpërdorim detyre. Ai u lirua pas marrjes në pyetje, por mbetet ende nën hetim. Mandelson ka mohuar çdo shkelje penale dhe më herët është shprehur se ndihet “thellësisht i tronditur” për miqësinë e tij me Epstein dhe për vuajtjet e viktimave të tij.
