Kryeministri britanik, Keir Starmer, ka deklaruar se oligarku rus Roman Abramovich duhet të lirojë menjëherë fondet e përfituara nga shitja e klubit Chelsea për të ndihmuar viktimat e luftës në Ukrainë, përndryshe do të përballet me veprime ligjore.
Abramovich, ish-pronari i Chelsea Football Club, u zotua në vitin 2022 se 2.5 miliardë paundët e përfituara nga shitja e klubit do të përdoreshin për të ndihmuar viktimat e pushtimit rus të Ukrainës. Megjithatë, fondet mbeten të ngrira në një llogari bankare në Mbretërinë e Bashkuar për shkak të mosmarrëveshjeve mbi mënyrën e përdorimit të tyre.
Qeveria britanike kërkon që paratë të përdoren ekskluzivisht për ndihmë humanitare në Ukrainë, ndërsa Abramovich ka këmbëngulur që ato të përfitojnë “të gjitha viktimat e luftës”, përfshirë edhe rusët. Sipas sanksioneve britanike, oligarku nuk ka akses në fondet, por ato mbeten ligjërisht në pronësinë e tij.
Duke folur në Parlament, Starmer tha se Mbretëria e Bashkuar ka lëshuar një licencë për transferimin e 2.5 miliardë paundëve dhe i dërgoi një paralajmërim të drejtpërdrejtë Abramovichit: të përmbushë angazhimin e dhënë ose qeveria do ta çojë çështjen në gjykatë për të siguruar që çdo qindarkë të shkojë për viktimat e luftës së nisur nga Rusia.
Edhe sekretarja e Jashtme, Yvette Cooper, deklaroi se Abramovich duhet ta respektojë zotimin e tij dhe të shmangë një betejë ligjore, por konfirmoi se qeveria është e gatshme të veprojë në gjykatë nëse fondet nuk lirohen. Përfaqësuesit e Abramovich kanë refuzuar të komentojnë.
Thesari britanik sqaroi se sipas kushteve të licencës, fondet duhet të përdoren vetëm për qëllime humanitare në Ukrainë dhe nuk mund të përfitojë as Abramovich dhe as ndonjë individ tjetër nën sanksione.
Abramovich, miliarder rus që e ka ndërtuar pasurinë në sektorin e naftës dhe gazit, u lejua të shiste Chelsea pas nisjes së luftës në Ukrainë, me kusht që të mos përfitonte personalisht nga transaksioni. Ai akuzohet për lidhje të ngushta me presidentin rus Vladimir Putin, akuza që i ka mohuar.
Sipas burimeve, Abramovich ka 90 ditë afat për të vepruar përpara se Mbretëria e Bashkuar të nisë procedurat ligjore. Ndërkohë, liderët e Bashkimit Europian pritet të shqyrtojnë propozime për përdorimin e aseteve ruse të ngrira në mbështetje të nevojave buxhetore dhe mbrojtëse të Ukrainës.
