Spanja ka përgënjeshtruar deklaratat e Shtëpisë së Bardhë se do të bashkëpunojë ushtarakisht me Shtetet e Bashkuara. Ministri i Jashtëm spanjoll, José Manuel Albares, mohoi “kategorikisht” pretendimin e zëdhënëses së Shtëpia e Bardhë, Caroline Levitt, se Madridi ka rënë dakord për bashkëpunim ushtarak me SHBA-në.
“Nuk ka ndryshuar qëndrimi ynë. Qëndrimi ynë ‘jo luftës’ mbetet i qartë dhe kategorik”, deklaroi Albares në një intervistë për radion Cadena SER.
Më herët, Levitt u kishte thënë gazetarëve se Spanja kishte rënë dakord të bashkëpunonte me ushtrinë amerikane, duke sugjeruar se Madridi kishte marrë mesazhin e presidentit amerikan.
Deklaratat vijnë një ditë pasi Donald Trump kërcënoi me ndërprerje tregtie me Madridin për shkak të qëndrimit spanjoll ndaj sulmeve amerikano-izraelite kundër Iranit. Uashingtoni kishte kërkuar përdorimin e bazave të përbashkëta detare dhe ajrore në jug të Spanjës, kërkesë që Madridi e refuzoi.
Qeveria spanjolle i ka dënuar bombardimet ndaj Iranit si “të pamatura” dhe “të paligjshme”. Zëvendëskryeministrja María Jesús Montero deklaroi se Spanja “nuk do të bëhet vasale” e një vendi tjetër, ndërsa kryeministri Pedro Sánchez paralajmëroi për rrezikun e një përshkallëzimi me pasoja globale.
