Gazeta italiane Panorama, në një artikull të Fausto Biloslavës, në bashkëpunim me gazetarin Eldin Haxhoviq, zbulon se anëtarët e një klubi airsofti nga Trieste, që në periudhën midis 1993 dhe 1995, e kishin paralajmëruar policinë italiane se “po qarkullonte një ‘ofertë’ që të shkosh në Sarajevë dhe të qëllosh me snajper”, por që hetimi penal kurrë nuk u hap.
“Kur i dëgjova për herë të parë lajmet në televizion për snajperistët e Sarajevës, menjëherë m’u kujtua një ngjarje e 30 viteve më parë", tha Roberto Ruzzier për Panoramën.
“Në kohën e rrethimit të Sarajevës isha pjesë e një klubi airsofti të krijuar në kryeqytetin e Julias", shpjegon 72-vjeçari nga Trieste.
Në artikull shpjegohet më tej se ky lloji hobi, simulime lufte me pushkë fallco që gjuajnë me kapsolla, më vonë u shndërrua edhe në garë kombëtare, ndërkohë që Jugosllavia po shpërbëhej në pragun e derës së Italisë.
“Internet atëherë pothuajse nuk ekzistonte dhe disa prej nesh filluam të ‘gërmonim’ në rrjet,” kujton Ruzzier.
“Njeri prej nesh, të cilin e quanim Rollo nuk ia mbaj mend mbiemrin zbuloi se po qarkullonte një ‘ofertë’ që të shkoje në Sarajevë dhe të qëlloje si snajperist.”
Në ofertë shkruhej se “siguroheshin pushka e snajperit dhe disa plumba – tre, nëse kujtoj mirë për një çmim të tepruar prej disa milion lirash italiane”.
Ruzzier shpjegon për Panoramën se brenda grupit kishin diskutuar për këtë dhe më pas vendosën ta raportonin në polici, duke theksuar se kjo kishte ndodhur me gjasë midis viteve 1993 dhe 1995.
Njësia speciale e policisë shtetërore italiane (DIGOS) konfirmoi se “ekzistojnë prova” për këtë raportim, por një hetim penal kurrë nuk u nis. Sipas gazetës Panorama, dosja me shumë gjasë është hedhur poshtë procedurë standarde pas kaq shumë vitesh.
Kujtojmë se hetimi në Itali për snajperistët e pasur që qëlluan civilët në Sarajevë u hap mbi bazën e një kallëzimi të bërë nga Ezio Gavazzeni, shkrimtar nga Milano, i cili kishte mbledhur prova për këto akuza. Në kallëzim, ndër të tjera, thuhet se “gjatë rrethimit të Sarajevës turistë të huaj të pasur paguanin (…) që të qëllonin mbi njerëz (…) gjatë luftës 1992–1996”. Gavazzeni përmend tre italianë: një nga Torino, një nga Milano dhe një nga Trieste./TRT Balkan/
