Një portal në "clear web", lehtësisht i aksesueshëm përmes motorëve të kërkimit, me mijëra regjistrime audio-video të vjedhura në mënyrë të paligjshme nga mbi 2.000 kamera sigurie të vendosura brenda shtëpive, qendrave estetike apo klinikave mjekësore, është zbuluar nga kompania trevizane Yarix, qendër e ekspertizës për sigurinë kibernetike e kompanisë Var Group, e cila e ka raportuar rastin te Policia Postare.
I aktivizuar të paktën që nga dhjetori 2024, portali lejon shikimin falas të fragmenteve të shkurtra të regjistrimeve dhe ofron mundësinë për të blerë akses në kamerat për përmbajtje të mëtejshme ose për të marrë kontrollin e tyre. Çmimi për secilën kamera varion nga rreth 20 deri në 575 dollarë.
Bëhet fjalë për video private të vjedhura nga shtëpi në mbarë botën, të cilat janë ngarkuar në këtë faqe të denoncuar nga Policia Postare, që klasifikon mbi 2.000 pamje sipas vendndodhjes, dhomave, personave dhe aktiviteteve të regjistruara. Duke analizuar ID-të e kamerave, është konstatuar se regjistrimet vijnë nga vende të ndryshme si Franca, Gjermania, Rusia, Ukraina, Meksika dhe Argjentina. Aktualisht, për Italinë janë identifikuar rreth 150 video.
Faqja ofron abonime me pagesë, me tarifa që ndryshojnë në varësi të popullaritetit dhe numrit të shikimeve të videove. Disa prej tyre janë shikuar mbi 20.000 herë.
Sipas një njoftimi nga Yarix, faqja përmban mijëra regjistrime audio-video, kryesisht me përmbajtje pornografike, të vjedhura në mënyrë të paligjshme nga kamerat e sigurisë shtëpiake dhe vende si qendra estetike apo studio mjekësore. E aksesueshme pa nevojën e regjistrimit, faqja ofron abonime të ndryshme sipas popullaritetit të përmbajtjeve.
Përmes një boti të ndërtuar në Telegram, përdoruesit mund të blejnë akses në një ose më shumë kamera. Çmimi ndryshon në varësi të numrit dhe popullaritetit të videove të publikuara – disa prej tyre janë parë më shumë se 20.000 herë.
Eksplorimi i përmbajtjeve mund të bëhet përmes një shiriti të zakonshëm kërkimi, duke përdorur tag-e, që përzgjedhin përmbajtjet sipas kërkesave të përdoruesit.
Sipas kompanisë, qëllimi i këtij investigimi është “të tërheqë vëmendjen e opinionit publik për problemin e rrjedhjes së të dhënave personale për shkak të dobësive në pajisje dhe në softuer.”
Yarix e raportoi zbulimin përmes Qendrës Operative për Sigurinë Kibernetike (COSC) në Venecia te Policia Postare e Venetos, me të cilën ka nënshkruar një protokoll bashkëpunimi që nga viti 2016 dhe ka bashkëpunuar më parë për hetime të ndryshme. Ekipi i Cyber Threat Intelligence është duke monitoruar portalin dhe kryen analiza të mëtejshme të dobishme për hetimin, i cili do të përcaktojë edhe nëse të gjitha videot vijnë nga kamera të fshehura dhe viktima të pavetëdijshme.
Nuk përjashtohet mundësia që krahas videove autentike të ketë edhe regjistrime apo transmetime live me aktorë, të krijuara me qëllimin për të tërhequr më shumë përdorues dhe më shumë abonime me pagesë.
