Koalicioni qeverisës i Bullgarisë njoftoi të enjten se do të japë dorëheqjen, pas një prej shpërthimeve më të mëdha të protestave në historinë e vendit.
“Të rinj, të moshuar, njerëz nga grupe të ndryshme etnike kanë ngritur zërin dhe kanë kërkuar dorëheqjen tonë. Ne e mbështesim këtë energji qytetare”, tha kryeministri Rossen Zhelyazkov i partisë GERB, duke shpallur me tone diplomatike fundin e koalicionit pas një viti në pushtet.
Koalicioni përbëhej nga GERB, forca qendër e djathtë që dominon politikën bullgare që nga viti 2008 e drejtuar nga Boyko Borissov, nga Partia Socialiste Bullgare pro Kremlinit dhe nga partia nacionaliste “Ka një popull të tillë”, e mbështetur në parlament nga oligarku i sanksionuar nga ligji amerikan Magnitsky, Delyan Peevski, dhe partia “Fillim i ri”.
Dhjetëra mijëra persona kanë dalë në rrugë që nga 26 nëntori, ndërsa protestat në kryeqytetin Sofje, sipas gjasave, i kanë kaluar 100 mijë pjesëmarrës, duke angazhuar sidomos të rinjtë në thirrjen për një të ardhme më të mirë. Ky numër ka tejkaluar valët e mëparshme të protestave të viteve 2013–2014 dhe 2020–2021, të cilat po ashtu kishin në shënjestër Peevski dhe Borissov.
Përshkallëzimi i zemërimit u shkaktua nga buxheti i qeverisë për vitin 2026, i cili propozoi taksa më të larta për sektorin privat për të financuar rritjet e pagave në sektorin publik, një rrugë e shkurtër, sipas kritikëve, drejt kontrollit më të madh të qeverisë mbi administratën publike, ushtrinë dhe policinë.
Pavarësisht premtimeve për rishikime, vala e protestave, e udhëhequr nga dyshja pro-BE “Ne vazhdojmë ndryshimin” dhe “Bullgaria demokratike”, nuk u qetësua, duke shprehur pakënaqësi të thellë me strukturat e pushtetit në Bullgari dhe një dëshirë për ndryshim të gjithanshëm në skenën politike.
Peevski të enjten deklaroi se “një koalicion Soros është fajtori”, duke iu referuar filantropit miliarder George Soros, i përbuzur nga shumë nacionalistë në Evropë.
Lëvizja e koalicionit ishte e papritur, pasi protestat e mëparshme nuk kishin arritur një rezultat të tillë.
Dorëheqja erdhi pak para një mocioni mosbesimi në parlament, i cili kishte pak gjasa të kalonte, pasi koalicioni mban shumicën e vendeve. Megjithë rreziqet për tensione dhe përplasje të mëtejshme, koalicioni në thelb nuk ishte në rrezik.
Rënia e qeverisë do të përkojë me hyrjen e Bullgarisë në Eurozonë më 1 janar dhe do të çojë në zgjedhje të parakohshme në fillim të vitit 2026, zgjedhjet e shtata të përgjithshme që nga viti 2021.
Dorëheqja pritet të forcojë “Ne vazhdojmë ndryshimin” dhe “Bullgaria Demokratike” përpara zgjedhjeve të ardhshme, megjithatë deri atëherë vendin do ta qeverisë një kabinet i përkohshëm i zgjedhur nga presidenti pro rus Rumen Radev./ Balkaninsight/
