Presidenti amerikan Donald Trump po diskuton “një gamë opsionesh” për të marrë kontrollin e Groenlandës, përfshirë edhe përdorimin e ushtrisë, ka deklaruar Shtëpia e Bardhë. Në një reagim për BBC, administrata amerikane e cilësoi Groenlandën – territor gjysmë-autonom të Danimarkës dhe vend anëtar i NATO-s – si “prioritet të sigurisë kombëtare” për Shtetet e Bashkuara.
Deklarata vjen vetëm disa orë pasi disa liderë europianë dolën me një qëndrim të përbashkët në mbështetje të Danimarkës, duke theksuar se Groenlanda i përket popullit të saj dhe se çdo vendim për statusin e saj i takon vetëm Danimarkës dhe Groenlandës. Kryeministrja daneze Mette Frederiksen paralajmëroi se çdo sulm amerikan do të nënkuptonte fundin e NATO-s.
Shtëpia e Bardhë deklaroi se “presidenti dhe ekipi i tij po shqyrtojnë opsione të ndryshme për këtë objektiv të rëndësishëm të politikës së jashtme” dhe se përdorimi i ushtrisë “është gjithmonë një opsion në dispozicion të komandantit të përgjithshëm”. Ndërkohë, Sekretari amerikan i Shtetit, Marco Rubio, u ka thënë ligjvënësve se SHBA nuk planifikon pushtim, por po shqyrton mundësinë e blerjes së Groenlandës nga Danimarka ose forma të tjera marrëveshjeje.
Në reagim, gjashtë vende europiane – Britania e Madhe, Franca, Gjermania, Italia, Polonia dhe Spanja – dolën në mbështetje të Danimarkës, duke theksuar respektimin e sovranitetit, integritetit territorial dhe parimeve të Kartës së OKB-së. Kryeministri i Groenlandës, Jens-Frederik Nielsen, kërkoi “dialog të respektueshëm” dhe nënvizoi se statusi i Groenlandës bazohet në të drejtën ndërkombëtare.
Debati është rindezur pas ndërhyrjes ushtarake amerikane në Venezuelë dhe arrestimit të presidentit Nicolás Maduro. Ndërkohë, zyrtarë pranë Trumpit kanë deklaruar hapur se është “pozicion zyrtar” i qeverisë amerikane që Groenlanda të bëhet pjesë e SHBA-së, duke shtuar shqetësimet në Europë dhe te vetë banorët e ishullit, shumica e të cilëve kundërshtojnë çdo bashkim me Shtetet e Bashkuara.
