Një shpërthim i fuqishëm ka ndodhur në orët e para të mëngjesit të së hënës në një bar në Crans-Montana, vendpushimi i njohur i skijimit në Zvicër, duke shkaktuar vdekjen e të paktën 10 personave dhe plagosjen e rëndë të dhjetëra të tjerëve.
Sipas Sky News, që citon burime nga policia lokale në kantonin Valais, mbi 10 persona janë plagosur, ndërsa autoritetet kanë bërë të ditur se ngjarja nuk po trajtohet si akt terrorist. Shpërthimi ka ndodhur rreth orës 01:30 sipas kohës lokale në barin “Le Constellation”, i frekuentuar kryesisht nga turistët gjatë festimeve të Vitit të Ri.
Pas shpërthimit, në ambientet e barit ka rënë një zjarr i madh, i cili u vu nën kontroll disa orë më vonë nga zjarrfikësit. Pamjet e publikuara nga mediat zvicerane tregojnë ndërtesën e përfshirë nga flakët.
Në vendngjarje u angazhuan dhjetëra ekipe shpëtimi, ambulanca dhe zjarrfikëse, ndërsa autoritetet vendosën edhe një ndalim të përkohshëm të fluturimeve mbi zonë. Sipas një zëdhënësi të policisë, mbi 100 persona ndodheshin brenda lokalit në momentin e shpërthimit. Transmetuesi publik zviceran RTS raportoi se shpërthimi ka ndodhur në bodrumin e objektit, ndërsa kapaciteti maksimal i barit ishte rreth 400 persona.
Gazeta zvicerane Blick sugjeron se zjarri mund të jetë shkaktuar nga fishekzjarrë të përdorur gjatë një koncerti, por policia nuk ka dhënë ende një deklaratë zyrtare mbi shkaqet e tragjedisë. Hetimet janë në vijim.
lCrans-Montana është një nga vendpushimet më luksoze të skijimit në Alpet Zvicerane, rreth dy orë larg Bernës, dhe pritet të presë një garë të Kupës së Botës FIS në fund të muajit janar.
