LENS, Zvicër, 1 janar (Reuters) – Rreth 40 persona kanë humbur jetën dhe 100 të tjerë janë plagosur, shumica prej tyre rëndë, pasi një shpërthim ka përfshirë një bar të mbushur me njerëz gjatë një feste të Vitit të Ri në resortin elitar të skive Crans-Montana, njoftuan të enjten autoritetet zvicerane.
Zjarri shpërtheu rreth orës 1:30 të mëngjesit (00:30 GMT) në një bar të quajtur “Le Constellation”, në resortin e Zvicrës jugperëndimore. Shkaku i shpërthimit mbetet i paqartë, por autoritetet thanë se duket të ketë qenë një aksident.
“Ne kemi numëruar rreth 100 persona të plagosur, shumica prej tyre rëndë.”
“Në këtë moment po e trajtojmë ngjarjen si zjarr dhe nuk po e konsiderojmë mundësinë e një sulmi,” tha prokurorja Beatrice Pilloud në një konferencë për shtyp, duke shtuar se autoritetet kanë hapur një hetim të plotë.
Disa nga viktimat janë shtetas të huaj, tha Stéphane Ganzer, shefi i sigurisë për kantonin Valais. Drejtori i policisë së kantonit, Frédéric Gisler, bëri të ditur se është hapur një linjë telefonike ndihme për familjarët.
“Nuk mund t’ju fsheh se të gjithë jemi të tronditur nga ajo që ndodhi gjatë natës në Crans,” tha Gisler në konferencën për shtyp.
“Bilanci ynë është rreth 100 të plagosur, shumica rëndë, dhe për fat të keq dhjetëra persona dyshohet se kanë humbur jetën,” shtoi ai, duke sqaruar se pacientët janë dërguar në spitale në Sion, Lozanë, Gjenevë dhe Cyrih.
Ministria e Jashtme italiane tha se informacionet nga policia zvicerane flasin për rreth 40 viktima, por Gisler refuzoi të jepte një shifër të saktë.
Më herët, policia njoftoi se shumë persona po trajtohen për djegie dhe se zona është mbyllur plotësisht, ndërsa mbi Crans-Montana është vendosur ndalim fluturimi. Autoritetet thanë se janë angazhuar 10 helikopterë dhe 40 ambulanca.
“Ajo që duhej të ishte një moment gëzimi u shndërrua, në ditën e parë të vitit në Crans-Montana, në një zi që prek të gjithë vendin dhe shumë më gjerë,” shkroi në X presidenti i Konfederatës Zvicerane, Guy Parmelin, duke shprehur ngushëllime.
Prokurorja Pilloud tha se autoritetet po përpiqen t’ua dorëzojnë trupat e viktimave familjeve të tyre.
“Janë vënë në dispozicion shumë burime për identifikimin mjeko-ligjor të viktimave. Këto burime synojnë që trupat t’u kthehen familjeve sa më shpejt të jetë e mundur,” tha ajo.
Ministri i Jashtëm italian, Antonio Tajani, tha se zjarri mund të jetë shkaktuar nga fishekzjarrët.
“Duket se ka qenë një aksident i shkaktuar nga një zjarr, nga ndonjë shpërthim, nga ndonjë fishek i hedhur gjatë festimeve të Vitit të Ri,” tha ai për kanalin televiziv italian Sky TG24.
