Një shpërthim i meningjitit në University of Kent në qytetin Canterbury ka shkaktuar alarm në Mbretërinë e Bashkuar, pasi dy persona kanë humbur jetën dhe të paktën 29 të tjerë dyshohet se janë infektuar.
Autoritetet britanike të shëndetit publik dyshojnë se shpërthimi ka nisur në një klub nate të qytetit, Club Chemistry, ku shumë studentë kishin frekuentuar mes datave 5 dhe 7 mars.
Në kampusin universitar janë vendosur masa të menjëhershme parandaluese. Studentëve dhe personave që kanë qenë në klubin e natës u janë shpërndarë antibiotikë parandalues, të cilët autoritetet thonë se janë efektivë në rreth 90% të rasteve. Gjithashtu, mijëra studentë dhe punonjës të universitetit po vaksinohen kundër variantit të identifikuar të bakterit meningokok të grupit B.
Pamjet nga kampusi tregojnë radhë të gjata studentësh me maska që presin për vaksinim, një situatë që për shumë prej tyre ka rikthyer kujtimet e pandemisë së Covid-19. Universiteti ka vendosur gjithashtu që provimet e kësaj jave të zhvillohen online dhe shumë studentë janë kthyer në shtëpi për arsye sigurie.
Meningjiti është një infeksion serioz që shkakton inflamacion të membranave të trurit dhe palcës kurrizore dhe mund të çojë edhe në infeksion të gjakut. Sipas ekspertëve, ai përhapet kryesisht përmes kontaktit të ngushtë dhe për këtë arsye shpërthime të tilla janë më të zakonshme në komunitete studentore ku njerëzit jetojnë pranë njëri-tjetrit.
Megjithatë, sekretari britanik i shëndetësisë Wes Streeting deklaroi se rreziku mbetet i ulët dhe se situata po monitorohet nga afër nga autoritetet shëndetësore.
