Organizata Botërore e Shëndetësisë (OBSH) ka paralajmëruar se situata humanitare në Rripin e Gazës mbetet dramatike, pavarësisht armëpushimit të brishtë të shpallur dy javë më parë. Drejtori i përgjithshëm i OBSH-së, Tedros Adhanom Ghebreyesus, deklaroi se uria dhe mungesa e ndihmave humanitare vijojnë të jenë shqetësuese, ndërsa evakuimet mjekësore janë shumë të kufizuara për të përmbushur nevojat e popullsisë së rraskapitur.
“Armëpushimi i shpallur dy javë më parë është i brishtë dhe është shkelur, por megjithatë vazhdon të mbahet. Ky është një lajm i mirë për të gjithë,” tha Tedros gjatë një konference për media.
Megjithatë, ai shtoi se “kriza është ende shumë larg përfundimit dhe nevojat humanitare janë të jashtëzakonshme”.
Sipas shefit të OBSH-së, niveli i urisë në Gaza nuk ka pësuar asnjë përmirësim. “Nuk ka ulje të urisë, sepse nuk ka ushqim të mjaftueshëm. Urisë i duhet kohë për t’u zhdukur, por në mungesë të furnizimeve të qëndrueshme, situata mbetet kritike,” theksoi ai.
Tedros vuri në dukje se shumica e kamionëve që po hyjnë aktualisht në Gaza janë komercialë, çka nuk e ndihmon popullsinë, pasi shumë njerëz nuk kanë mundësi financiare për të blerë ushqim apo produkte të tjera të nevojshme.
Në lidhje me evakuimet mjekësore, drejtori i OBSH-së paralajmëroi se infrastruktura aktuale është e pamjaftueshme. “Vetëm një ose dy rrugë janë të hapura për evakuime dhe ato funksionojnë vetëm një herë në javë. Kjo është e pamjaftueshme për përmasat e krizës. Për disa pacientë, këto vonesa do të thonë vdekje,” tha ai, duke shtuar se rreth 700 persona kanë humbur jetën gjatë pritjes për evakuim.
Sipas të dhënave të OBSH-së, rreth 15 mijë pacientë, përfshirë 4 mijë fëmijë, kanë nevojë urgjente për trajtim jashtë Gazës. Tedros i bëri thirrje Izraelit të lejojë lëvizjen e pacientëve drejt Bregut Perëndimor, përfshirë Kudsin Lindor, dhe njëkohësisht u kërkoi vendeve të tjera të pranojnë më shumë pacientë për trajtim.
Ai nënvizoi gjithashtu rëndësinë e hapjes së të gjitha kalimeve kufitare, përfshirë kalimin e Rafahut, i cili sipas planit duhej të hapej që javën e kaluar. “Një sasi e konsiderueshme ndihme është grumbulluar në Al-Arish, në Egjipt, dhe është gati të hyjë në Gaza sapo të hapet kalimi,” deklaroi ai.
OBSH ka hartuar një plan 60-ditor për menaxhimin e emergjencës humanitare, që kërkon 45 milionë dollarë për të mbështetur shërbimet shpëtimtare, për të forcuar mbikëqyrjen e sëmundjeve dhe për të koordinuar partnerët ndërkombëtarë. Por Tedros paralajmëroi se rindërtimi i sistemit shëndetësor të Gazës do të kërkojë të paktën 7 miliardë dollarë.
Sipas të dhënave të fundit të publikuara nga OBSH, më shumë se 170 mijë persona janë plagosur që nga fillimi i konfliktit, përfshirë 5 mijë të amputuar dhe 3.600 me djegie të rënda, ndërsa rreth 1 milion njerëz kanë nevojë për kujdes shëndetësor mendor.
“Situata në Gaza mbetet një krizë humanitare e përmasave katastrofike,” përfundoi Tedros, duke theksuar nevojën urgjente për veprim të koordinuar ndërkombëtar dhe për sigurimin e hyrjes së menjëhershme të ndihmave në territor.
