Presidenti amerikan Donald Trump ka bërë të ditur se më 25 shtator do të mirëpresë në Shtëpinë e Bardhë Presidentin e Turqisë, Rexhep Tajip Erdogan. Lajmi u bë publik përmes një postimi në platformën Truth Social, ku Trump tha se takimi do të fokusohet në çështje të rëndësishme bilaterale, përfshirë bashkëpunimin tregtar dhe atë ushtarak.
Ndër temat kryesore që pritet të diskutohen është edhe çështja e avionëve luftarakë F-35, një pikë e ndjeshme në marrëdhëniet mes dy vendeve, pas përjashtimit të Turqisë nga programi disa vite më parë për shkak të blerjes së sistemit rus të mbrojtjes ajrore S-400.
“Jam i kënaqur që do të mirëpres Presidentin e Turqisë, Rexhep Tajip Erdogan, në Shtëpinë e Bardhë më 25 shtator. Po bashkëpunojmë me Presidentin në shumë marrëveshje tregtare dhe ushtarake, përfshirë blerjen në shkallë të gjerë të avionëve Boeing, një marrëveshje të rëndësishme për F-16, si dhe vazhdimin e bisedimeve për F-35, të cilat presim t’i finalizojmë me një rezultat pozitiv. Presidenti Erdogan dhe unë gjithmonë kemi pasur marrëdhënie shumë të mira. Mezi pres ta takoj më 25 të këtij muaji!”, shkruan Trump.
Kujtojmë se marrëdhëniet mes Uashingtonit dhe Ankarasë kanë kaluar nëpër periudha të tensionuara gjatë viteve të fundit, por ky takim sinjalizon një përpjekje për normalizim dhe forcim të bashkëpunimit strategjik mes dy vendeve.
Takimi i shumëpritur pritet të jetë i rëndësishëm jo vetëm për marrëdhëniet SHBA–Turqi, por edhe për balancat e sigurisë në rajonin e Mesdheut dhe më gjerë.
