Presidenti amerikan Donald Trump është informuar mbi një gamë të gjerë mjetesh të fshehta dhe ushtarake që mund të përdoren kundër Iranit, kanë bërë të ditur për CBS News dy zyrtarë të Departamentit të Mbrojtjes.
Sipas burimeve, sulmet me raketa me rreze të gjatë veprimi mbeten një opsion për një ndërhyrje të mundshme amerikane, ndërsa Pentagoni ka paraqitur gjithashtu alternativa që përfshijnë operacione kibernetike dhe fushata psikologjike.
Të hënën, Trump njoftoi vendosjen e një tarife 25% për mallrat që vijnë nga vende me lidhje tregtare me Iranin, në një kohë kur organizatat për të drejtat e njeriut raportojnë se më shumë se 600 protestues janë vrarë gjatë tre javëve të fundit të protestave antiqeveritare në vend.
Ministri i Jashtëm iranian ka deklaruar se Teherani është i hapur për bisedime me Uashingtonin, por theksoi se vendi mbetet “i përgatitur për luftë”.
Burimet bëjnë të ditur se ekipi i sigurisë kombëtare i Trump pritet të zhvillojë të martën një takim në Shtëpinë e Bardhë për të diskutuar opsionet ndaj Iranit, megjithëse nuk është e qartë nëse presidenti do të jetë i pranishëm.
Më herët, Trump kishte deklaruar se ushtria amerikane po shqyrtonte “opsione shumë të forta” për ndërhyrje nëse numri i viktimave mes protestuesve do të rritej. Ai tha gjithashtu se drejtuesit iranianë e kishin kontaktuar për të negociuar, por paralajmëroi se SHBA “mund të detyrohet të veprojë para një takimi”.
Kriza ekonomike, rënia e monedhës iraniane dhe keqmenaxhimi ekonomik kanë zgjeruar pakënaqësinë publike, duke u shndërruar në një krizë legjitimiteti për Udhëheqësin Suprem të Iranit, Ajatollah Ali Khamenei.
