Departamenti Amerikan i Shtetit ka vendosur të pezullojë përkohësisht përpunimin e vizave emigruese për shtetas nga 75 vende, në kuadër të një përpjekjeje për të ashpërsuar kontrollin ndaj aplikantëve që konsiderohen me rrezik të lartë për t’u kthyer në barrë publike.
Sipas një memorandumi të Departamentit të Shtetit, të siguruar fillimisht nga Fox News Digital, u është kërkuar zyrtarëve konsullorë që të refuzojnë aplikimet për viza, bazuar në legjislacionin ekzistues, ndërkohë që institucioni po rishikon procedurat e verifikimit dhe të kontrollit të aplikantëve.
Lista e vendeve të prekura përfshin, mes të tjerash, Shqipërinë, Somalinë, Rusinë, Afganistanin, Brazilin, Iranin, Irakun, Egjiptin, Nigerinë, Tajlandën dhe Jemenin.
Pezullimi do të hyjë në fuqi më 21 janar dhe do të zgjasë pa afat të përcaktuar, deri në përfundimin e rishikimit të plotë të procedurave të përpunimit të vizave nga Departamenti i Shtetit.
Somalia është vënë nën vëmendje të veçantë pas një skandali të madh mashtrimi me fondet publike në shtetin e Minesotës, ku u zbuluan abuzime të gjera me programet e ndihmës sociale. Shumë nga të përfshirët ishin shtetas somalezë ose amerikanë me origjinë somaleze.
Sipas udhëzimeve të reja, vizat mund të refuzohen bazuar në faktorë si: gjendja shëndetësore, mosha, njohja e gjuhës angleze, gjendja financiare, si dhe nevoja e mundshme për kujdes mjekësor afatgjatë. Edhe persona që kanë përfituar ndihma shtetërore në të kaluarën mund të penalizohen.
Përjashtimet nga ky pezullim do të jenë shumë të kufizuara dhe do të lejohen vetëm pasi aplikantët të kalojnë vlerësimet lidhur me kriterin e “barrës publike”.
Lista e plotë e shteteve të prekura nga pezullimi i vizave:
Afganistan, Shqipëri, Algjeri, Antigua dhe Barbuda, Armeni, Azerbajxhan, Bahamas, Bangladesh, Barbados, Bjellorusi, Belize, Butan, Bosnje dhe Hercegovinë, Brazil, Mianmar (Burma), Kamboxhia, Kamerun, Kepi i Gjelbër, Kolumbi, Bregu i Fildishtë, Kubë, Republika Demokratike e Kongos, Dominikë, Egjipt, Eritre, Etiopi, Fixhi, Gambia, Gjeorgji, Gana, Grenadë, Guatemalë, Guine, Haiti, Iran, Irak, Xhamajkë, Jordani, Kazakistan, Kosovë, Kuvajt, Kirgistan, Laos, Liban, Liberi, Libi, Maqedonia e Veriut, Moldavi, Mongoli, Mali i Zi, Marok, Nepal, Nikaragua, Nigeri, Pakistan, Republika e Kongos, Rusi, Ruandë, Shën Kits dhe Nevis, Shën Luçia, Shën Vincent dhe Grenadinet, Senegal, Sierra Leone, Somali, Sudani i Jugut, Sudan, Siri, Tanzani, Tajlandë, Togo, Tunizi, Ugandë, Uruguai, Uzbekistan dhe Jemen.
Pezullimi do të mbetet në fuqi derisa Departamenti i Shtetit të përfundojë rishikimin e plotë të procedurave të vizave./FoxNews
Burimi: https://www.foxnews.com/politics/us-freezes-all-visa-processing-75-countries-including-somalia-russia-iran
