Departamenti Amerikan i Shtetit njoftoi të shtunën se ka “raporte të besueshme” për një plan të Hamasit për të kryer një sulm të afërt ndaj civilëve palestinezë në Gaza, gjë që do të shkelte rëndë marrëveshjen e armëpushimit, raporton BBC.
Në një deklaratë zyrtare, SHBA tha se një sulm i tillë do të përbënte një “shkelje të rëndë dhe të drejtpërdrejtë të armëpushimit” dhe do të dëmtonte përparimin e arritur përmes përpjekjeve ndërmjetëse.
Departamenti i Shtetit nuk dha detaje të mëtejshme rreth natyrës së sulmit apo burimit të informacionit.
Aktualisht, po zbatohet faza e parë e armëpushimit midis Izraelit dhe Hamasit, ku janë liruar të gjithë pengjet e gjallë, ndërsa trupat e pengjeve të vrarë po kthehen në Izrael. Si pjesë e marrëveshjes, Izraeli ka liruar 250 të burgosur palestinezë dhe 1,718 persona të ndaluar nga Gaza.
SHBA ka informuar edhe garantuesit e tjerë të marrëveshjes, përfshirë Egjiptin, Katarin dhe Turqinë, duke kërkuar që Hamasi të respektojë angazhimet e veta.
“Nëse Hamasi ndërmerr këtë sulm, do të merren masa për të mbrojtur popullin e Gazës dhe për të ruajtur integritetin e armëpushimit,” theksohet në deklaratë.
Derisa Hamasi nuk ka reaguar ende, presidenti amerikan Donald Trump paralajmëroi më parë në platformën Truth Social se, nëse Hamasi vazhdon të sulmojë civilët në Gaza, SHBA do të ndërhyjë, megjithatë sqaroi se nuk do të dërgonte trupa amerikane në Gaza.
