Agjencia amerikane e imigracionit, oficerët e së cilës janë përfshirë në dy të shtëna fatale në Minneapolis, ka konfirmuar se do të dërgojë agjentë për të mbështetur operacionet e sigurisë gjatë Lojërave Olimpike Dimërore, që nisin në Itali më 6 shkurt.
Konfirmimi erdhi nga Immigration and Customs Enforcement (ICE), pas raportimeve që shkaktuan alarm dhe zemërim në Itali. Kryetari i bashkisë së Milanos, Beppe Sala, deklaroi për radion italiane: “Kjo është një milici që vret… sigurisht që nuk janë të mirëpritur në Milano.”
Një zëdhënës i ICE theksoi se “të gjitha operacionet e sigurisë mbeten nën autoritetin italian” dhe sqaroi se agjencia nuk do të kryejë operacione të zbatimit të ligjit të imigracionit jashtë SHBA-së.
Sipas deklaratës, njësia Homeland Security Investigations (HSI) po mbështet Shërbimin Diplomatik të Sigurisë të Departamentit Amerikan të Shtetit dhe autoritetet vendase për të verifikuar dhe zbutur rreziqet nga organizatat kriminale transnacionale. Deklarata iu dha agjencisë AFP dhe u konfirmua edhe nga burime të ambasadës amerikane për Associated Press.
Ministri i Brendshëm i Italisë, Matteo Pantedosi, fillimisht u shpreh se nuk ishte në dijeni të ardhjes së zyrtarëve amerikanë të imigracionit dhe deklaroi se delegacionet e huaja mund të zgjedhin sigurinë e tyre, duke thënë: “Nuk shoh se ku është problemi, është diçka shumë normale.”
Megjithatë, pas publikimit të pamjeve nga Minneapolis, ku një person u qëllua nga agjentë federalë, reagimet në Itali u shtuan. Mediat raportuan se dy gazetarë të televizionit publik Rai u kërcënuan nga zyrtarë të ICE gjatë raportimit në Minneapolis, ku një agjent paralajmëroi se do t’u thyente xhamin e makinës nëse vazhdonin xhirimet.
Lojërat Olimpike Dimërore Milano–Cortina do të zhvillohen nga 6 deri më 22 shkurt, ndërsa çështja e pranisë së ICE në Itali pritet të mbetet temë debati publik dhe politik.
