Sekretari i Përgjithshëm i NATO, Mark Rutte, deklaroi sot se veprimet ushtarake të Shteteve të Bashkuara dhe Izraelit në Iran po kufizojnë aftësinë e Teheranit për të zhvilluar armë bërthamore dhe raketa balistike, por theksoi qartë se Aleanca nuk do të përfshihet në konflikt.
Duke folur për televizionin gjerman ARD nga Brukseli, Rutte u shpreh se “është me të vërtetë shumë e rëndësishme ajo që SHBA-të po bëjnë atje, së bashku me Izraelin, sepse kjo eliminon, zvogëlon aftësinë e Iranit për të fituar aftësi bërthamore dhe raketa balistike”.
Ai nënvizoi se nuk ekziston asnjë plan që NATO të përfshihet drejtpërdrejt në këtë luftë. “Nuk ka absolutisht asnjë plan që NATO të përfshihet në diçka të tillë. Aleatët individualë po bëjnë gjithçka që munden për të lehtësuar atë që amerikanët po bëjnë së bashku me Izraelin”, tha Rutte.
