Sekretari i Përgjithshëm i NATO-s, Mark Rutte, deklaroi të mërkurën në Forumin Ekonomik Botëror në Davos se është e domosdoshme mbrojtja e Arktikut nga ndikimi rus dhe kinez, duke theksuar se në këtë pikë pajtohet me qëndrimin e presidentit amerikan Donald Trump.
Rutte bëri thirrje për “diplomaci të menduar mirë” për të menaxhuar tensionet rreth Grenlandës, duke sugjeruar që çështjet territoriale të trajtohen larg vëmendjes publike, ndërsa fokusi të mbetet tek siguria kolektive dhe interesat strategjike të Aleancës.
Duke vlerësuar rolin e Trumpit, kreu i NATO-s theksoi se presioni i ushtruar nga administrata amerikane ka ndikuar ndjeshëm në rritjen e shpenzimeve të mbrojtjes nga vendet evropiane. Sipas tij, pa këtë presion, disa ekonomi të mëdha si Spanja, Italia dhe Belgjika nuk do të arrinin objektivin e shpenzimeve prej 2 për qind të Prodhimit të Brendshëm Bruto për mbrojtjen deri në vitin 2025.
Rutte përmendi Poloninë si një nga aleatët më të ngushtë të SHBA-së dhe vuri në dukje vështirësitë që po përballen vendet anëtare në rritjen e kapaciteteve të prodhimit ushtarak.
Lidhur me shqetësimet e shprehura nga Trump mbi gatishmërinë e Evropës për të reaguar në rast të aktivizimit të Nenit 5 të NATO-s, Rutte siguroi se Evropa do të përmbushte detyrimet e saj, duke sjellë si shembull mbështetjen e aleatëve pas sulmeve të 11 shtatorit.
Ai nënvizoi se siguria e Shteteve të Bashkuara lidhet drejtpërdrejt me një Arktik, Atlantik dhe Evropë të sigurt, duke theksuar se NATO mbetet thelbësore jo vetëm për mbrojtjen e Evropës, por edhe për interesat strategjike të SHBA-së.
