Një 18-vjeçar zviceran ndërroi jetë të shtunën në spitalin e Cyrihut, duke rritur në 41 numrin e viktimave nga zjarri që shpërtheu në barin “Le Constellation” në qendrën e skive Kran-Montana natën e Vitit të Ri, njoftuan autoritetet gjyqësore lokale.
“Një shtetas zviceran 18-vjeçar vdiq në spitalin e Cyrihut më 31 janar”, tha prokurorja e përgjithshme e kantonit Valais në një deklaratë të përcjellë për Agjencinë Franceze të Lajmeve, një muaj pas tragjedisë.
Numri i viktimave nga zjarri në barin “Le Constellation” tani ka shkuar në 41, nga 40 që ishte bilanci i mëparshëm, ndërsa 116 persona u plagosën. Disa prej të plagosurve, shumë me dëmtime serioze, vazhdojnë të trajtohen në spitale në Zvicër, Francë, Gjermani, Itali dhe Belgjikë.
Mes 41 të vdekurve, të moshave 14–39 vjeç, përfshihen 23 zviceranë (njëri me shtetësi franceze) dhe 18 të huaj, përfshirë 8 francezë (njëra me shtetësi francezo-izraelito-britanike), 6 italianë (njëri me shtetësi italiene dhe Emirateve të Bashkuara Arabe), një belge, një portugez, një rumun dhe një turk.
Ndër të plagosurit, 67 janë zviceranë, 21 francezë, 10 italianë dhe 4 serbë.
Hetimet paraprake tregojnë se zjarri shpërtheu për shkak të shkëndijave nga qirinj “shatërvan” që ranë mbi materialin akustik në tavanin e katit nëntokë të barit, duke përfshirë kryesisht adoleshentë dhe të rinj të moshës së hershme.
Hetimet do të zbulojnë rrethanat e sakta të tragjedisë, nëse pronarët e barit kanë respektuar standardet e sigurisë dhe do të përcaktojnë përgjegjësitë.
Çifti francez që zotëron barin po hetohet për “vrasje nga pakujdesia, lëndime trupore nga pakujdesia dhe shkaktim të zjarrit nga pakujdesia”.
Nga e mërkura, hetimi penal ka përfshirë edhe dy zyrtarë të sigurisë së komunës Kran-Montana, të cilët pranuan se nuk kanë kryer kontrolle vjetore sigurie dhe zjarri që nga viti 2019, siç kërkohet ligjërisht.
