Bilanci i viktimave civile nga fushata ushtarake e Izraelit kundër Hezbollahut në Liban po rritet vazhdimisht, duke përfshirë edhe një numër të madh fëmijësh.
Sipas autoriteteve libaneze, gati 100 fëmijë janë vrarë gjatë javës së fundit, ndërsa më shumë se 200 mijë persona janë detyruar të largohen nga shtëpitë e tyre. Organizata ndërkombëtare humanitare War Child bëri të ditur se rreth një në çdo dhjetë fëmijë në Liban është ndër të zhvendosurit.
Në total, sipas të dhënave zyrtare, më shumë se 800 mijë njerëz janë zhvendosur si pasojë e përshkallëzimit të luftimeve.
Autoritetet libaneze raportojnë gjithashtu se të paktën 18 paramedikë dhe punonjës të emergjencës janë vrarë gjatë operacioneve të shpëtimit. Kryqi i Kuq Libanez konfirmoi se një nga vullnetarët e tij, Youssef Assaf, humbi jetën kur një sulm izraelit goditi ambulancën e tij gjatë një misioni shpëtimi në jug të vendit në fillim të kësaj jave.
Ndërkohë, një tjetër sulm izraelit të enjten goditi kampusin e Universitetit Libanez, universiteti kryesor publik i vendit. Sipas agjencisë shtetërore të lajmeve në Liban, në këtë sulm u vranë drejtori i Fakultetit të Shkencave, Dr. Hussein Bazzi, si dhe profesori Dr. Murtada Srour.
