Marina Meksikane konfirmoi se një avion i saj u rrëzua pranë Galveston-it, në shtetin amerikan të Texas, gjatë një misioni mjekësor që përfundoi tragjikisht. Si pasojë e incidentit, pesë persona kanë humbur jetën, dy të tjerë kanë shpëtuar pa lëndime, ndërsa një person rezulton ende i zhdukur.
Sipas njoftimit zyrtar, avioni i tipit “King Air ANX-1209” kishte në bord tetë persona, përfshirë një të mitur. Në mjetin ajror udhëtonin katër oficerë të Marinës Meksikane dhe katër civilë, të angazhuar në mbështetje të Fondacionit “Michou y Mau”, një organizatë jofitimprurëse që ndihmon fëmijët me djegie të rënda.
I mituri që po transportohej për trajtim mjekësor është konfirmuar mes viktimave. Operacionet e kërkim-shpëtimit u kryen nga Roja Bregdetare e Shteteve të Bashkuara, e cila lokalizoi avionin në oqean.
Ministria e Jashtme e Meksikës, përmes një deklarate në platformën X, shprehu ngushëllimet për familjet e viktimave dhe njoftoi se, nëpërmjet Konsullatës së Përgjithshme të Meksikës në Hjuston, ka vendosur kontakte me autoritetet lokale për të ofruar mbështetje konsullore.
Sipas raportimeve lokale, avioni po përgatitej për ulje në momentin e rrëzimit, ndërsa në zonë raportohej mjegull e dendur, e cila mund të ketë ndikuar në incident.
