Një rrëfim i pazakontë vjen nga mbesa e Benito Musolinit, Alessandra Mussolini, në një intervistë ekskluzive për gazetën italiane Corriere della Sera. Ish-deputetja dhe figurë e njohur publike ka ndarë për herë të parë detaje intime nga jeta e gjyshes së saj, Rachele Mussolini, gruaja e diktatorit fashist të Italisë.
Pjesa më befasuese e intervistës është pa dyshim zbulimi i një tradhtie bashkëshortore që, sipas Alessandrës, jo vetëm që nuk shkatërroi martesën, por e bëri atë më të fortë.
“Rachele nuk ishte një grua e nënshtruar. Ajo nuk e bëri këtë për hakmarrje, por për të rifituar burrin e saj,” – tregon Alessandra.
“Tradhtia i vuri përballë si të barabartë. Ai e kuptoi se ajo kishte forcën për të jetuar edhe pa të. Kjo i bashkoi më shumë.”
Sipas rrëfimit të saj, Rachele kishte pasur një lidhje të fshehtë me Corrado Varolin – një dashuri e hershme nga rinia. Një ngjarje dramatike ndodhi kur Musolini u kthye pa paralajmërim në shtëpi. Pas një sinjali të koduar që paralajmëroi ardhjen e tij, Varoli u detyrua të fshihej në një dollap për të shmangur një përballje të rrezikshme.
“Gjyshi erdhi me armë. Kishte kuptuar gjithçka. Por nuk ndodhi asgjë. E kaluan, e heshtën, dhe ecën përpara,” – thotë Alessandra.
Ajo shton se historia nuk ishte një akt rebelimi, por një përpjekje për të rikthyer një marrëdhënie të lëkundur nga tradhtitë dhe mungesat e vetë Duçes.
“Rachele nuk veproi për hakmarrje. Donte ta kuptonte ndjesinë që ai përjetonte vazhdimisht. Ishte mënyra e saj për të balancuar martesën.”
Rrëfimi vjen si pjesë e promovimit të librit të saj autobiografik “Benito. Trëndafilat dhe Gjembat”, ku Alessandra përpiqet të japë një pasqyrë më të thellë dhe më njerëzore të figurës së gjyshes së saj – larg imazhit të zakonshëm të një gruaje të heshtur që jetoi në hijen e një burri të pushtetshëm dhe të frikshëm.
“Rachele nuk ishte viktimë. Ishte një grua me karakter të jashtëzakonshëm, që sfidoi kohën e saj. Kjo histori dashurie, me gjithë kontradiktat, ishte reale – më reale se çdo portret zyrtar.”/Corriere della Sera
