Autoritetet në shtetin amerikan të New Mexico kanë nisur kontrolle në ish-fermën e financierit të ndjerë Jeffrey Epstein, pas informacioneve të reja që sugjerojnë se në pronë mund të jenë kryer abuzime ndaj grave dhe vajzave të mitura.
Hetuesit po kryejnë kërkime në zonën malore ku ndodhet ferma, ndërsa dyshohet se aty janë kryer krime serioze gjatë viteve kur Epstein e përdorte pronën. Sipas autoriteteve, veprimet janë ndërmarrë pas publikimit në janar të dokumenteve të reja nga United States Department of Justice. Në këto materiale përfshihet edhe një pretendim se Epstein kishte urdhëruar varrosjen e trupave të dy vajzave të huaja në kodrat pranë pronës së izoluar.
Hetimi u rihap pas vendimit të Prokurorit të Përgjithshëm të shtetit New Mexico për të shqyrtuar sërish aktivitetet e dyshuara kriminale që mund të kenë ndodhur në fermën që ndodhet në jug të kryeqytetit të shtetit, Santa Fe.
Muajin e kaluar, New Mexico u bë shteti i parë në Shtetet e Bashkuara që krijoi një “komision të së vërtetës” legjislativ për të hetuar korrupsionin e mundshëm publik që mund të ketë lejuar Epstein të operonte në fshehtësi në fermë për rreth 26 vite, deri në vdekjen e tij në vitin 2019.
Prona u shit në vitin 2023 tek një biznesmen nga Teksasi dhe më pas mori një emër të ri. Sipas autoriteteve, pronarët aktualë kanë bashkëpunuar me hetuesit dhe u kanë dhënë atyre akses për të kryer kërkimet në terren.
Çështja e dosjeve të Epstein është kthyer në një temë të vazhdueshme politike në SHBA, duke prekur edhe administratën e presidentit Donald Trump. Publikimi i miliona dokumenteve shtesë më 30 janar ka ekspozuar gjithashtu lidhje shoqërore të Epstein me politikanë, biznesmenë dhe figura të njohura nga fusha të ndryshme, të cilët ai i kishte ftuar në fermën e tij gjatë viteve.
