Një raport i CIA-s ka hedhur poshtë pretendimet ruse se Ukraina ka tentuar të sulmojë rezidencën e presidentit Vladimir Putin në rajonin e Novgorodit gjatë një sulmi me dronë në fund të dhjetorit. Ministria e Mbrojtjes së Rusisë deklaroi më herët se, pas një ekzaminimi teknik të një droni të rrëzuar më 29 dhjetor, ishte konstatuar se objektivi përfundimtar i sulmit ishte një objekt brenda rezidencës së Putinit. Sipas Moskës, të dhënat e nxjerra nga sistemi i navigimit do t’i përcillen palës amerikane.
Në vijim, ministri i Jashtëm rus Sergei Lavrov akuzoi Ukrainën për tentativë sulmi ndaj rezidencës presidenciale, duke e përdorur këtë si justifikim për kundërpërgjigje nga Rusia.
Megjithatë, sipas Wall Street Journal, CIA në raportin e saj drejtuar presidentit amerikan Donald Trump ka vlerësuar se dronët ukrainas nuk e kishin në shënjestër rezidencën e Putinit. Inteligjenca amerikane ka përcaktuar se objektivi ishte një instalacion ushtarak rus në të njëjtën zonë, por jo në afërsi të rezidencës.
Raporti thotë gjithashtu se drejtori i CIA-s, John Ratcliffe, e ka informuar presidentin Trump për këto gjetje. Pas kësaj, Trump ka ribotuar një artikull që sugjeronte se “Rusia është në rrugën e paqes”.
Deri më tani, gjetjet e raportuara nga media nuk janë konfirmuar zyrtarisht as nga CIA dhe as nga Shtëpia e Bardhë.
