Departamenti Amerikan i Drejtësisë ka nisur publikimin e më shumë se tre milionë faqe dokumentesh që lidhen me Jeffrey Epstein. Autoritetet amerikane e kanë cilësuar këtë publikim si një nga më të mëdhenjtë ndonjëherë, duke e krahasuar vëllimin e materialeve me “rreth dy Kulla Eiffel me faqe”.
Dokumentet përfshijnë fotografi, shkëmbime emailesh – shumica e të cilave janë të redaktuara – si dhe informacione të detajuara mbi pronat e shumta të Epstein-it dhe rrethanat e vdekjes së tij në një qeli burgu në Nju Jork në vitin 2019. Në publikim përfshihet edhe video e qelisë ku ai qëndroi para vdekjes.
Ndër zhvillimet më të bujshme janë fotografi që duket se tregojnë Andrew Mountbatten-Windsor në një situatë komprometuese me një grua. Po ashtu, email-e të zbuluara tregojnë se Epstein dhe publicisti i tij kishin kërkuar nga Sarah Ferguson të publikonte një deklaratë ku ai të përshkruhej si “jo pedofil”, pasi ajo ishte distancuar prej tij në një intervistë të vitit 2011.
Dokumente të tjera sugjerojnë se Andrew e kishte ftuar Epstein-in në Pallatin Buckingham në vitin 2010, menjëherë pasi ky i fundit ishte liruar nga arresti shtëpiak për kërkim prostitucioni nga vajza të mitura. Në një tjetër email, miliarderi Elon Musk duket se pyet Epstein-in për mundësinë e vizitës në ishullin e tij privat, duke e quajtur atë një “festë të egër”.
Autoritetet theksojnë se përfshirja e emrave në dokumente nuk nënkupton automatikisht shkelje ligjore. Shumë prej personave të përmendur në publikime të mëparshme kanë mohuar çdo lidhje kriminale me Epstein-in.
Ndërkohë, kryeministri britanik Sir Keir Starmer ka përsëritur thirrjen që Andrew Mountbatten-Windsor të dëshmojë para Kongresit Amerikan për marrëdhëniet e tij me Epstein. Ai theksoi se vendosja e viktimave në qendër kërkon gatishmëri për të ndarë çdo informacion të mundshëm.
“Viktimat e Epstein-it duhet të jenë prioriteti i parë,” deklaroi Starmer, duke shtuar se çështja e një ndjese publike mbetet në dorën e Andrew-it.
Publikimi i dokumenteve pritet të vazhdojë edhe në ditët në vijim, ndërsa autoritetet dhe media po i shqyrtojnë materialet faqe pas faqeje, në kërkim të fakteve të reja mbi një nga skandalet më të errëta të viteve të fundit.
