Ligjvënësit amerikanë kanë publikuar më shumë se 20 mijë faqe dokumente nga pasuria e financierit të turpëruar dhe të dënuarit për abuzim seksual Jeffrey Epstein, mes të cilave ndodhen edhe disa që përmendin presidentin Donald Trump.
Të mërkurën, demokratët e Komitetit të Mbikëqyrjes së Dhomës së Përfaqësuesve publikuan tre shkëmbime email-esh midis Epstein dhe bashkëpunëtores së tij të ngushtë Ghislaine Maxwell, e cila aktualisht po vuan një dënim prej 20 vitesh burg për trafikim seksual.
Ata publikuan gjithashtu korrespondencë mes Epstein dhe autor Michael Wolff, i njohur për librat e tij mbi Trump.Brenda pak orësh, republikanët e Dhomës së Përfaqësuesve publikuan një sasi të madhe dokumentesh për të kundërshtuar, siç thanë ata, përpjekjen e demokratëve për të “përzgjedhur” materiale që “krijojnë një narrativë të rreme për të njollosur Presidentin Trump”.
Email-et janë marrë nga komiteti pas një thirrjeje zyrtare (subpoena) ndaj pasurisë së Epstein si pjesë e hetimeve mbi mënyrën si u trajtua çështja e tij nga autoritetet federale.
Zëdhënësja e Shtëpisë së Bardhë, Karoline Leavitt, tha se dokumentet janë “rrjedhur në mënyrë të qëllimshme nga demokratët te mediat liberale për të shpikur një narrativë të rreme kundër Presidentit Trump”.
Sipas saj, “Presidenti Trump e përzuri Jeffrey Epstein nga klubi i tij dekada më parë, sepse ishte sjellë në mënyrë të papërshtatshme ndaj punonjëseve të tij femra, përfshirë Giuffre”.
Trump ka qenë dikur mik me Epstein, por thotë se u prishën në fillim të viteve 2000, dy vjet para arrestimit të parë të Epstein, dhe ka mohuar çdo përfshirje në veprimtaritë e tij.
Çfarë tregojnë email-et mes Epstein dhe Maxwell
Një email i vitit 2011 i publikuar nga demokratët tregon Epstein duke i shkruar Maxwell:
“Dua të kuptosh se qeni që s’ka lehur është Trump… [VIKTIMA] kaloi orë të tëra në shtëpinë time me të.”
Epstein shton se Trump “nuk është përmendur kurrë”, madje as nga një “shef policie”.
Maxwell i përgjigjet: “Kam menduar për këtë…”
Emri i viktimës është redaktuar, por versioni i papërpunuar tregon emrin “Virginia”, që i referohet Virginia Giuffre, e cila sipas Shtëpisë së Bardhë “ka thënë vazhdimisht se Presidenti Trump nuk ishte përfshirë në asnjë abuzim dhe ishte i sjellshëm në kontaktet e tyre të pakta”.
Giuffre në një dëshmi të vitit 2016 pohoi se nuk kishte parë Trump të përfshihej në ndonjë abuzim.
Çfarë përmbajnë email-et mes Epstein dhe Michael Wolff
Në korrespondencën e vitit 2015, Wolff i shkruan Epstein se CNN planifikon t’i bëjë pyetje Trumpit për marrëdhënien e tyre.
Epstein pyet: “Nëse do t’i jepnim një përgjigje të përgatitur, çfarë mendon se duhet të thotë?”
Wolff i përgjigjet:
“Mendoj se duhet ta lejosh të bjerë vetë. Nëse mohon se ka qenë në avionin tënd apo në shtëpinë tënde, kjo mund të të shërbejë politikisht. Mund ta dëmtojë, ose, nëse fiton, mund ta shpëtosh më vonë dhe ta kesh në borxh.”
Në një email tjetër të tetorit 2016, pak para zgjedhjeve presidenciale, Wolff i propozon Epstein një intervistë që “mund ta përfundojë politikisht Trumpin”.
Në një shkëmbim të janarit 2019, Epstein i shkruan Wolff se Trump i kishte thënë “të jepte dorëheqjen” nga klubi Mar-a-Lago, por ai “nuk ka qenë kurrë anëtar”. Epstein shton se Trump “natyrisht e dinte për vajzat, ndaj i kërkoi Ghislaine të ndalonte”.
Wolff ka konfirmuar në një video se “disa nga këto email-e janë reale dhe tregojnë diskutime për marrëdhënien e Epstein me Trump”.
Përmendet edhe Princi Andrew
Një tjetër dokument i marsit 2011 tregon ish-Princin Andrew duke iu përgjigjur një emaili që Maxwell i kishte përcjellë nga Epstein lidhur me akuza për marrëdhënie me një masazhatore që punonte për Epstein.
Andrew i përgjigjet:
“Çfarë është gjithë kjo? Nuk di asgjë për këtë! Ju lutem, thuani se kjo s’ka lidhje me mua.”
Dy ditë më vonë, gazeta Mail on Sunday publikoi artikullin me foton e famshme të Andrew dhe Virginia Giuffre. Andrew ka mohuar çdo akuzë dhe nuk është proceduar penalisht.
Përfshihet edhe Peter Mandelson
Në dokumente përmendet edhe Lord Peter Mandelson, i cili u shkarkua si ambasador i Britanisë në SHBA në shtator për lidhjet e tij me Epstein.
Email-et tregojnë se ata kanë qenë në kontakt deri në vitin 2016, megjithëse lidhja e fundit e njohur publikisht datonte në vitin 2010.
Në një email të 6 nëntorit 2016, Epstein i shkruan:
“63 vjeç. E bëre.”
Mandelson i përgjigjet:
“Me vështirësi. Kam vendosur të zgjas jetën time duke kaluar më shumë kohë në SHBA.”
Epstein kthen: “Në Shtëpinë e Bardhë të Donaldit?”
Reagimi i viktimave
Një nga viktimat e njohura të Epstein, Annie Farmer, tha pas publikimit të dokumenteve:
“Sa më shumë informacione dalin, aq më shumë pyetje shtohen. Viktimat meritojnë transparencë të plotë.”
Ajo kërkoi publikimin e plotë të “dosjeve Epstein”, duke theksuar se “mijëra vajza dhe gra të dëmtuara nga Epstein dhe bashkëpunëtorët e tij kanë të drejtë ta dinë të vërtetën e plotë.”
