Në veri të Gjirit Persik ndodhet një ishull i vogël, vetëm rreth 20 kilometra katrorë, që konsiderohet pika më e ndjeshme e ekonomisë iraniane. Ishulli Kharg është terminali më i rëndësishëm i eksportit të naftës për regjimin iranian, nga ku kalojnë çdo ditë rreth 7 milionë fuçi naftë drejt tregjeve ndërkombëtare, kryesisht drejt Azisë dhe Kinës.
Sipas ekspertëve, pa këtë terminal ekonomia iraniane do të përballej me një goditje të rëndë. Megjithatë, edhe pse lufta mes Iranit, SHBA-së dhe Izraelit ka hyrë në ditët e saj më intensive, ishulli Kharg nuk është goditur deri tani nga sulmet ushtarake.
Analistët thonë se Uashingtoni po shmang një sulm të tillë për disa arsye. Së pari, Shtetet e Bashkuara duan të ruajnë infrastrukturën energjetike të Iranit për periudhën pas luftës. Së dyti, një goditje ndaj Kharg mund të përkeqësonte marrëdhëniet me Kinën, një nga blerësit kryesorë të naftës iraniane. Një arsye tjetër është frika se Irani do të kundërpërgjigjej duke sulmuar objektet energjetike të vendeve arabe aleate të SHBA-së, si Arabia Saudite apo Katari.
Për momentin, Kharg konsiderohet një “vijë e kuqe” për Uashingtonin, por ekspertët paralajmërojnë se situata mund të ndryshojë nëse konflikti përshkallëzohet. Nëse Irani do të godiste drejtpërdrejt objektiva amerikane ose do të bllokonte trafikun e naftës në Ngushticën e Hormuzit, atëherë ky ishull mund të kthehej në një nga objektivat kryesore të luftës.
Rëndësia e Kharg lidhet edhe me faktin se brigjet iraniane janë të cekëta dhe nuk lejojnë ankorimin e tankerëve të mëdhenj të naftës. Për këtë arsye, nafta transportohet përmes tubacioneve nënujore drejt këtij ishulli, ku më pas ngarkohet në anije të mëdha për eksport. Kjo e bën Kharg një pikë jetike për ekonominë iraniane, por njëkohësisht edhe dobësinë e saj më të madhe strategjike.
