Kryeministri bullgar Rosen Zhelezkov ka dhënë dorëheqjen pas protestave masive në vend, ku mijëra qytetarë kanë kërkuar ndryshim politik, reforma ekonomike dhe luftë më të fortë ndaj korrupsionit.
Demonstratat, që u përshkallëzuan ditët e fundit, tronditën seriozisht stabilitetin e qeverisë dhe çuan në një mocion mosbesimi në Parlament.
Zhelezkov e njoftoi dorëheqjen në një fjalim televiziv, vetëm pak minuta para votimit të mocionit. Ai u shpreh se vendimi i tij ishte i nevojshëm në këtë moment të rëndësishëm për vendin, pasi Bullgaria po përgatitet t’i bashkohet Eurozonës më 1 janar.
“Ky është momenti i duhur për të dhënë dorëheqjen. Bullgaria duhet të ecë përpara si pjesë e vendeve evropiane që po ndërtojnë Unionin. Premtuam stabilitet makroekonomik dhe e arritëm, me rritje të të ardhurave dhe kuadër të qëndrueshëm fiskal për vitin 2025. Kemi propozuar gjithashtu një buxhet për mbrojtjen sociale për vitin 2026, duke synuar rritjen e fuqisë blerëse,” tha Zhelezkov.
Dorëheqja e tij vjen në prag të një faze të re integrimi evropian për Bullgarinë, ndërsa protestuesit e shohin këtë zhvillim si një fitore të presionit qytetar dhe si hap drejt një qeverisjeje më të përgjegjshme.
