Shefi i njohur danez René Redzepi ka njoftuar largimin nga drejtimi i restorantit të famshëm Noma në Kopenhagë, të cilin e bashkëthemeloi në vitin 2003 dhe e ktheu në një nga restorantet më të rëndësishme dhe inovative në botë.
Noma, i udhëhequr nga Redzepi për më shumë se dy dekada, është vlerësuar vazhdimisht në skenën ndërkombëtare të gastronomisë dhe është shpallur pesë herë restoranti më i mirë në botë nga lista prestigjioze “World’s 50 Best Restaurants”.
Vendimi për t’u tërhequr vjen pas raportimeve të fundit në media dhe në rrjetet sociale për abuzime dhe sjellje të ashpra ndaj punonjësve në vitet 2000 dhe 2010. Akuzat u rikthyen në vëmendje edhe gjatë hapjes së një pop-up restoranti 16-javor të Noma në Los Angeles, ku u organizuan protesta kundër Redzepit.
Në një deklaratë të publikuar në Instagram, ai pranoi përgjegjësinë për mënyrën si kishte drejtuar restorantin në të kaluarën.
“Javët e fundit kanë sjellë vëmendje dhe diskutime të rëndësishme për restorantin tonë, industrinë dhe mënyrën si kam udhëhequr në të kaluarën. Kam punuar për t’u bërë një lider më i mirë dhe Noma ka bërë hapa të mëdhenj për të ndryshuar kulturën e brendshme. Por e di që këto ndryshime nuk e rregullojnë të kaluarën,” shkroi ai.
Redzepi shtoi se pas më shumë se dy dekadash në krye të restorantit, ka vendosur të tërhiqet për t’i lënë drejtuesve të tjerë të vazhdojnë kapitullin e ri të Noma. Ai njoftoi gjithashtu se ka dhënë dorëheqjen edhe nga bordi i organizatës jofitimprurëse MAD, të cilën e themeloi në vitin 2011.
Në një video të publikuar në rrjetet sociale, shefi i kuzhinës u shfaq i emocionuar duke kërkuar falje ndaj stafit të tij. Deri më tani, përfaqësues të restorantit Noma nuk kanë dhënë komente të tjera mbi zhvillimin.
