Prodhuesit kryesorë të barnave në Bashkimin Evropian kanë reaguar me shqetësim të thellë ndaj vendimit të fundit të administratës Trump për të vendosur një tarifë prej 15% mbi barnat e importuara nga BE-ja. Federata Evropiane e Industrive Farmaceutike (EFPIA), që përfaqëson gjigandë si Bayer, Novo Nordisk, Pfizer dhe Johnson & Johnson, e ka cilësuar këtë masë si “të rrezikshme dhe të paprecedentë”.
Sipas EFPIA, vendosja e këtyre tarifave rrezikon të çrregullojë zinxhirët e furnizimit, të ngadalësojë investimet në kërkim dhe zhvillim dhe të kufizojë aksesin e pacientëve në terapi jetike – si ato të reja, ashtu edhe ekzistuese. Organizata paralajmëron se vendimi përbën gjithashtu një shkelje të qartë të marrëveshjes së Organizatës Botërore të Tregtisë (OBT) të vitit 1995, e cila garanton tregti të lirë nga tarifa për ilaçet dhe përbërësit e tyre aktivë.
Nga ana tjetër, një zëdhënës i Komisionit Evropian ka bërë të ditur se importet farmaceutike nga SHBA-ja në BE nuk do të preken nga masa të ngjashme, duke e cilësuar vendimin e Uashingtonit si “të njëanshëm dhe të dëmshëm për besimin në tregtinë ndërkombëtare”.
EFPIA u bën thirrje autoriteteve amerikane dhe evropiane për zgjidhje të balancuara dhe të qëndrueshme për financimin e inovacionit farmaceutik, duke theksuar se ka mënyra më efektive për të rritur aksesin në shëndetësi pa cenuar sigurinë e pacientëve apo rritjen ekonomike globale.
