Një njoftim i papritur ka tronditur Pallatin Buckingham dhe mediat në mbarë botën: Princi Andrea, Duka i Jorkut, djali i Princit të ndjerë Filip dhe i Mbretëreshës Elisabeta II, ka shpallur synimin për të hequr dorë nga titulli i tij mbretëror.
Vendimi, që ka ardhur pas një sërë skandalesh të pandërprera që kanë hedhur hije mbi gjithë familjen mbretërore Windsor, është bërë publik orët e fundit nga mediat kryesore ndërkombëtare.
Pozita e Princit Andrea brenda monarkisë britanike kishte kohë që ishte bërë jashtëzakonisht e brishtë. Që në vitin 2022 ai ishte tërhequr nga jeta publike, me miratimin e Mbretëreshës, dhe iu hoqën të gjitha titujt ushtarakë nderi dhe të drejtat për t’u quajtur “Lartësia e Tij Mbretërore”. Duka i Jorkut u përfshi kryesisht në skandalin lidhur me çështjen Epstein.
Akuza për ngacmime seksuale, ngritur nga Virginia Giuffre – e cila pretendonte se ishte detyruar të kishte marrëdhënie me Princin kur ishte ende e mitur – shkaktoi një krizë pa precedentë. Edhe pse Andrea i ka mohuar gjithmonë akuzat, një fotografi që e tregon së bashku me Giuffre-n dhe një intervistë e dështuar për BBC në vitin 2019 komprometuan rëndë imazhin e tij publik. Çështja përfundoi me një marrëveshje gjyqësore me shumë milionë paund, e cila megjithatë nuk e ndali valën e reagimeve në media.
Kohët e fundit, presioni që Princi të largohej përfundimisht nga jeta publike ishte rritur, sidomos nën shtytjen e Mbretit Karli III. Sipas burimeve pranë Pallatit, Sovrani kishte bërë përpjekje të vazhdueshme për ta izoluar të vëllanë, me qëllim mbrojtjen e reputacionit të kurorës. Së fundmi, Mbreti i kishte ndërprerë edhe shpenzimet për sigurinë dhe e kishte nxitur të transferohej në një rezidencë më modeste.
Heqja dorë nga titulli mbretëror nga ana e Dukës së Jorkut përbën kulmin e një historie të gjatë dhe të dhimbshme. Është një akt ekstrem, që synon të ndërpresë çdo lidhje formale mes Princit dhe monarkisë. Edhe pse ai mbetet ende në vijën e trashëgimisë për fronin, ky njoftim nënvizon përjashtimin e tij të plotë nga jeta institucionale.
Ky hap shihet si një përpjekje për t’i dhënë fund polemikave publike dhe për të zhvendosur vëmendjen e mediave larg Familjes Mbretërore.
Princi Andrea, i cili do të vazhdojë të njihet si Duka i Jorkut, po përgatitet tashmë për një jetë plotësisht private, duke u tërhequr nga dritat e skenës që në fund e dogjën.
Monarkia britanike po përpiqet të hapë një kapitull të ri, duke shpresuar se ky gjest do të mjaftojë për të rindërtuar besimin e publikut, i cili është tronditur thellë nga skandalet që përfshinë njërin prej anëtarëve më të dukshëm të saj./The Sun
