Protestuesit zhvilluan një demonstratë këtë pasdite në Parliament Square, në Westminster, në mbështetje të një organizate të shpallur terroriste.
Policia Metropolitane deklaroi se disa prej protestuesve kanë qenë fizikisht dhe verbalish agresivë, në një “përpjekje të koordinuar për të penguar oficerët që të kryejnë detyrën e tyre”, duke shtuar se disa nga arrestimet janë bërë për sulm ndaj policisë.
Një burrë është parë teksa merrej nga policia, ndërsa turma në Parliament Square brohoriste “turp t’ju vijë” dhe “po mbështesni gjenocidin”.
Policia Metropolitane njoftoi për arrestimet e para të ditës në platformën X vetëm 12 minuta pas nisjes zyrtare të protestës.
Në një përditësim tjetër në X, policia tha se protestuesit pro-palestinezë kaluan pranë një kundër-proteste dhe se oficerët ishin vendosur për të mbajtur të ndara të dy grupet.
Marshi arriti në Whitehall rreth orës 14:00, ku po mbahen fjalime. Policia ka bërë të ditur se demonstrata “duhet” të përfundojë deri në orën 17:30.
Policia Metropolitane paralajmëroi para fillimit të protestës: “Shprehja e mbështetjes për një organizatë të shpallur terroriste është vepër penale sipas Aktit për Terrorizmin.”
Organizatori i protestës, Defend Our Juries, tha se vlerësohet që rreth 1,500 persona janë mbledhur për këtë tubim, ku shumë mbanin pankarta me mbishkrimet: “Jam kundër gjenocidit. Mbështes Palestine Action.”
“Palestine Action” është shpallur organizatë terroriste që nga data 5 korrik, pasi deputetët votuan me shumicë dërrmuese për ndalimin e saj, duke e bërë të paligjshme çdo shprehje mbështetjeje për grupin.
Më shumë se 530 persona u arrestuan në demonstratën e fundit të madhe kundër ndalimit të “Palestine Action” si grup terrorist. Megjithatë, Policia Metropolitane përdori “lirimin në rrugë me kusht” për të shmangur mbajtjen e të gjithë të ndaluarve në komisariat.
“Street bail” (lirimi me kusht në rrugë) lejon oficerët të lirojnë të dyshuarit me një njoftim për t’u paraqitur në një datë të mëvonshme në komisariat, pa u shoqëruar menjëherë në ambientet e policisë.
Organizatorët i inkurajuan protestuesit të mos pranonin “street bail”, duke shkruar në një dokument paraprak:
“Nuk do të jetë praktikisht e mundur për policinë të arrestojë 1,000 persona që nuk bashkëpunojnë në të njëjtën ditë, dhe kjo është arsyeja strategjike e mosbashkëpunimit. Kjo rrit presionin mbi shtetin.”
Në një reagim ndaj këtij udhëzimi, një zëdhënës i Policisë Metropolitane i tha Sky News se veprimi do të ishte “i gabuar”.
Ndalimi i grupit “Palestine Action” erdhi pak pas dëmtimit të dy avionëve ushtarakë Voyager në bazën ajrore RAF Brize Norton në Oxfordshire më 20 qershor, dëmtime që vlerësohen rreth 7 milionë paund.
Ky ndalim do të përballet me një sfidë ligjore në nëntor, pasi Gjykata e Lartë ka pranuar një shqyrtim gjyqësor të plotë, kërkuar nga bashkëthemeluesja e “Palestine Action”, Huda Ammori.
