Presidenti amerikan Donald Trump prezantoi dje në Nju Jork një plan me 21 pika për t’i dhënë fund luftës në Gaza dhe për të ndërtuar një administratë pas Hamasit. Gjatë takimit me udhëheqës arabë dhe myslimanë, Trump nënvizoi urgjencën për t’i dhënë fund konfliktit, duke theksuar se “çdo ditë që kalon e izolon gjithnjë e më shumë Izraelin në arenën ndërkombëtare”.
Sipas burimeve të Axios, i dërguari special i Trump për Lindjen e Mesme, Steve Witkoff, u shpreh optimist se në ditët në vijim do të ketë progres konkret. Propozimi përmban elementë të ideve më parë të diskutuara gjatë muajve të fundit, përfshirë kontributet e Jared Kushner dhe Tony Blair.
Pikat kryesore të planit:
Lirimi i të gjithë pengjeve të mbetura;
Armëpushim i përhershëm;
Tërheqje graduale e forcave izraelite nga Gaza;
Qeverisje e re në Gaza pa Hamasin;
Formimi i një force sigurie me pjesëmarrjen e palestinezëve dhe trupave nga vende arabe e myslimane;
Financim nga vendet arabe/myslimane për administratën e re dhe rindërtimin e Gazës;
Një rol i kufizuar për Autoritetin Palestinez në qeverisje.
Në takim morën pjesë zyrtarë të lartë nga Arabia Saudite, Emiratet e Bashkuara Arabe, Katari, Egjipti, Jordania, Turqia, Indonezia dhe Pakistani. Trump kërkoi angazhimin dhe mbështetjen e tyre për zbatimin e planit.
Kërkesat e udhëheqësve arabë:
Sipas dy burimeve, udhëheqësit arabë vendosën disa kushte për të mbështetur planin:
Asnjë aneksim nga Izraeli në Bregun Perëndimor apo Gaza;
Asnjë pushtim apo ndërtim vendbanimesh të reja në Gaza;
Mbrojtje e statusit të Xhamisë Al-Aksa;
Rritje e menjëhershme e ndihmës humanitare për Gazën.
Trump, sipas burimeve, u zotua se nuk do të lejonte aneksime të territoreve palestineze – një qëndrim që ishte raportuar më parë nga Politico. Në përfundim të takimit, udhëheqësit e vendeve pjesëmarrëse dhanë mbështetjen e tyre dhe u shprehën të gatshëm për të marrë pjesë në zbatimin e planit.
Në një deklaratë të përbashkët të mërkurën, ata ritheksuan përkushtimin për të bashkëpunuar me Trump dhe për rolin e tij udhëheqës në arritjen e paqes.
Presidenti egjiptian Abdel Fattah al-Sisi lëshoi një deklaratë të veçantë ku shprehu vlerësimin për iniciativën:
“Vlerësoj përpjekjet e Presidentit Trump për të ndalur luftën në Gaza dhe për paqen në Lindjen e Mesme në tërësi. Propozimet e tij ofrojnë një bazë të rëndësishme për ndërtimin e paqes.”
Takimi u cilësua pozitiv nga përfaqësuesit arabë, të cilët theksuan se Trump është “absolutisht i përkushtuar” për përfundimin e luftës.
Sot, Sekretari i Shtetit i SHBA-së, Marco Rubio, dhe Steve Witkoff zhvilluan bisedime me ministrat e jashtëm të Arabisë Saudite, Katarit, Emirateve të Bashkuara Arabe, Egjiptit dhe Jordanisë për të përpunuar planin në detaje dhe për ta bërë atë të zbatueshëm.
Nga ana tjetër, zyrtarët izraelitë konfirmuan se Kryeministri Benjamin Netanyahu është i informuar për parimet e planit, ndërsa ndihmësi i tij Ron Dermer ka pasur kontakte me Kushnerin dhe Blair-in.
Trump pritet t’ia paraqesë planin Netanyahut të hënën në Shtëpinë e Bardhë, në përpjekje për të siguruar edhe mbështetjen e tij.
