Presidenti i SHBA-së, Donald Trump, deklaroi për CNN se Hamasi do të përballet me “shfarosje të plotë” nëse refuzon të tërhiqet nga pushteti dhe kontrolli i Gazës, në kohën kur ai po përpiqet të çojë përpara planin e tij të propozuar për armëpushim.
“Shfarosje e plotë!” – ishte përgjigjja e Trump për gazetarin e CNN, Jake Tapper, i cili e pyeti të shtunën përmes një mesazhi se çfarë do të ndodhte nëse Hamasi këmbëngul të qëndrojë në pushtet.
Tapper e shtyu më tej diskutimin duke iu referuar komenteve të senatorit Lindsey Graham, i cili sugjeroi se Hamasi e kishte refuzuar planin për armëpushim me 20 pika, duke ngulur këmbë në “mosçarmatimin, ruajtjen e kontrollit palestinez mbi Gazën dhe lidhjen e lirimit të pengjeve me negociatat”.
“A është kjo e pavërtetë?”, pyeti Tapper. “Do ta shohim. Vetëm koha do ta tregojë!” – u përgjigj Trump.
Presidenti theksoi se pret një sqarim “së shpejti” nëse Hamasi është vërtet i gatshëm për paqe. Kur u pyet nëse kryeministri izraelit Benjamin Netanyahu mbështet përfundimin e fushatës ajrore në Gaza dhe vizionin e tij më të gjerë, Trump u përgjigj shkurt: “Po, Bibi”.
Ai shtoi se shpreson që plani i tij për armëpushim të realizohet dhe theksoi përkushtimin e tij në këtë drejtim. Më herët gjatë së shtunës, Trump njoftoi se Izraeli ka pranuar fazën e parë të tërheqjes, siç parashikohet në planin e tij për ndërprerjen e luftimeve ndërmjet Izraelit dhe Hamasit.
Gjithashtu, Trump bëri të ditur se Izraeli kishte pezulluar përkohësisht sulmet ajrore në Gaza – një hap që ai e cilësoi si thelbësor drejt finalizimit të një marrëveshjeje armëpushimi, lirimit të pengjeve dhe paralajmërimit ndaj Hamasit për të vepruar shpejt.
Megjithatë, më herët gjatë ditës, CNN raportoi se të paktën 67 persona ishin vrarë në Gaza nga bombardimet izraelite, sipas burimeve spitalore në këtë zonë. Ndërkohë, Trump zbuloi të premten se Hamasi i ishte përgjigjur pozitivisht planit të tij me 20 pika për t’i dhënë fund konfliktit. Në një video të postuar në Truth Social, ai e përshkroi ditën si “të madhe” dhe zhvillimet si “të jashtëzakonshme”.
