Presidenti i Iranit, Masoud Pezeshkian, deklaroi se përfundimi i luftës në rajon varet nga ndalimi i menjëhershëm i sulmeve nga Shtetet e Bashkuara dhe Izraeli, si dhe nga garanci që këto sulme të mos përsëriten në të ardhmen.
Deklarata u bë gjatë një bisede telefonike me kryeministrin e Indisë, Narendra Modi. Sipas një postimi të ambasadës iraniane në Indi në rrjetin social X, Pezeshkian theksoi se pa këto kushte nuk mund të ketë paqe të qëndrueshme në rajon.
Presidenti iranian propozoi gjithashtu krijimin e një kuadri të ri sigurie rajonale, të përbërë nga vendet e Azisë Perëndimore, me qëllim garantimin e paqes dhe stabilitetit përmes bashkëpunimit rajonal, pa ndërhyrje nga fuqitë e jashtme.
Ndërkohë, media shtetërore iraniane raportojnë për një kërcënim të ri ndaj presidentit amerikan, Donald Trump. Sipas agjencisë iraniane Tasnim News Agency, një burim iranian ka paralajmëruar se nëse Trump do të vendoste këmbë në ishullin iranian Kharg, do të përballej me një “surprizë”.
“Nëse terroristi Trump bën një gabim të tillë, do t’i rezervojmë një surprizë të tillë sa nuk do të jetë në gjendje të largojë as arkivolet e ushtarëve të tij nga toka jonë”, citohet të ketë thënë burimi, duke shtuar më tej tensionet në retorikën mes palëve.
