Një dokument strategjik 38-faqësh i titulluar “Nga një protektorat iranian i rrënuar në një aleat të begatë” po qarkullon në administratën e Presidentit amerikan Donald Trump, duke propozuar një vizion të ri për Rripin e Gazës pas konfliktit.
Sipas Washington Post, plani i hartuar nga Fondacioni Humanitar i Gazës (GHF) parashikon një ndërhyrje të drejtpërdrejtë amerikane për të menaxhuar dhe rindërtuar zonën për të paktën 10 vite. Ai përfshin zhvendosjen e përkohshme të palestinezëve, ofrimin e ndihmave financiare për ata që pranojnë të largohen dhe transformimin e Gazës në një qendër industriale e turistike.
Propozimi parashikon pagesa deri në 5,000 dollarë, subvencione për qira dhe ndihmë ushqimore për banorët që pranojnë zhvendosjen, ndërsa pronarëve të tokave u ofrohen kupona digjitalë për rindërtim. Dokumenti njihet si “Trusti për Rindërtimin, Përshpejtimin Ekonomik dhe Transformimin e Gazës” dhe shoqërohet me sloganin: “Nga një protektorat iranian i rrënuar në një aleat të begatë abrahamik.”
Presidenti Trump ka deklaruar më 4 shkurt se SHBA duhet të “marrë nën kontroll” Gazën dhe ta kthejë në një “rivierë të Lindjes së Mesme”, komente që kanë nxitur reagime të ashpra nga palestinezët dhe organizatat humanitare, të cilat paralajmërojnë për rrezikun e një zhvendosjeje të detyruar të popullsisë.
Ndërkohë, situata në terren mbetet e tensionuar. Forcat izraelite kanë intensifikuar sulmet në periferi të qytetit të Gazës, duke shkaktuar shkatërrime të mëdha dhe zhvendosje të reja të civilëve, ndërsa kabineti i sigurisë i kryeministrit Benjamin Netanyahu po shqyrton një plan për marrjen nën kontroll të plotë të qytetit.
