Tensionet diplomatike mes Spanjës dhe Izraelit janë përshkallëzuar më tej, pasi qeveria spanjolle ka vendosur të tërheqë përfundimisht ambasadoren e saj në Izrael dhe të ulë nivelin e përfaqësimit diplomatik në Tel Aviv.
Vendimi u publikua në gazetën zyrtare të shtetit dhe parashikon që ambasadorja Ana Sálomon të mos zëvendësohet, ndërsa ambasada spanjolle në Izrael do të drejtohet vetëm nga një i ngarkuar me punë.
Ky veprim vjen si përgjigje reciproke ndaj një vendimi të mëparshëm të qeverisë izraelite. Në maj të vitit 2024, kabineti i kryeministrit Benjamin Netanyahu kishte tërhequr ambasadoren e Izraelit në Madrid, Rodica Radian-Gordón, pasi Spanja njohu zyrtarisht shtetin e Palestinës.
Ambasadorja Sálomon ishte thirrur për konsultime që në shtator të vitit të kaluar dhe nuk ishte kthyer më në Izrael. Marrëdhëniet mes dy vendeve u tensionuan më tej gjatë luftës në Gaza, sidomos pasi qeveria spanjolle e përshkroi ofensivën izraelite si “gjenocid ndaj popullsisë palestineze”.
Madridi ka ndërmarrë gjithashtu masa për të kufizuar marrëdhëniet me Izraelin, ndërsa kryeministri Pedro Sánchez ka shprehur hapur mbështetje për protestuesit pro-palestinezë.
Përplasjet diplomatike janë thelluar edhe në kontekstin e tensioneve të fundit në Lindjen e Mesme dhe luftës me Iranin. Pas debatit për përdorimin e bazave ushtarake spanjolle nga SHBA, qeveria e Sánchez ka bërë të ditur se Spanja nuk do të marrë pjesë në misionin ndërkombëtar për rihapjen e Ngushticës së Hormuzit, të propozuar nga Franca.
Ministrja e Mbrojtjes, Margarita Robles, deklaroi se kjo iniciativë nuk është ngritur zyrtarisht nga NATO apo Bashkimi Evropian dhe për këtë arsye Spanja nuk do të angazhohet në të për momentin.
