Presidentja e përkohshme e Venezuelës, Delcy Rodriguez, njoftoi të premten se ka shkarkuar nga qeveria ministrin e Industrisë, Alex Saab. Saav konsiderohet një nga më besnikët e presidentit të rrëzuar Nicolas Maduro.
Biznesmeni i lindur në Kolumbi, i cili kishte forcuar dukshëm lidhjet midis industrive të naftës të Venezuelës dhe Iranit, vende ndaj të cilave u vendosën sanksione nga SHBA-ja, u emërua Ministër i Industrisë në dhjetor 2024.
Ai u largua nga qeveria më pak se dy javë pas kapjes së mentorit të tij në Karakas në operacionin ushtarak amerikan të 3 janarit.
Vendimi erdhi një ditë pasi Rodriguez zhvilloi një takim me kreun e CIA-s, John Ratcliffe.
“Falënderoj shokun tim Alex Saab për punën e tij në shërbim të vendit; ai tani do të marrë detyra të reja”, tha Rodriguez nëpërmjet Telegramit.
54-vjeçari në vitin 2021 u burgos në Shtetet e Bashkuara, të cilat e akuzuan atë për krijimin e një sistemi abuzimi me ndihmën humanitare në dobi të Maduro dhe qeverisë së tij.
Ai u shkëmbye në dhjetor 2023 me dhjetë amerikanë që ishin të burgosur në Venezuelë. Lirimi i tij u përshkrua si një “triumf” nga Maduro.
