Pas marrëveshjes së armëpushimit që solli lirimin e 20 pengjeve izraelite dhe qindra të burgosurve palestinezë, paqartësitë mbi hapat e ardhshëm në procesin e paqes në Gaza po shtohen.
Familjet izraelite të pengjeve të vrarë kanë shprehur zemërim, pasi gjatë shkëmbimit u dorëzuan vetëm katër nga 28 trupat e pajetë të konfirmuar. Sipas marrëveshjes, e publikuar nga mediat izraelite, vetë Hamas dhe fraksionet e tjera palestineze kanë pranuar se mund të mos jenë në gjendje të identifikojnë të gjitha mbetjet njerëzore brenda afatit të caktuar.
Ndërsa pengjet e liruara po i nënshtrohen kontrolleve mjekësore, mediat izraelite raportojnë për ndalim brutal, përfshirë uri dhe tortura. Nga ana tjetër, shumë prej palestinezëve të liruar – të cilët kanë qenë të ndaluar pa akuza gjatë luftës – pretendojnë gjithashtu se janë keqtrajtuar në burgjet izraelite. Disa prej tyre, pasi dolën të lirë, mësuan se familjarët e tyre ishin vrarë gjatë luftimeve.
Në këtë klimë të pasigurt politik, Donald Trump e quajti ditën e shkëmbimit “historike për Lindjen e Mesme”, sapo zbriti në Uashington pas nënshkrimit të një dokumenti zyrtar për paqen.
“Deklarata e Trump për Paqe dhe Mirëqenie të Qëndrueshme”
Në një samit të zhvilluar dje në Egjipt, katër liderë botërorë nënshkruan një dokument të ri politik mbi konfliktin: Presidenti amerikan Donald Trump, Presidenti egjiptian Abdul Fattah al-Sisi, Emiri i Katarit Tamim bin Hamad Al Thani dhe Presidenti turk Recep Tayyip Erdogan.
Dokumenti, i publikuar nga Shtëpia e Bardhë, thekson:
“Ne mirëpresim angazhimin historik për zbatimin e Marrëveshjes së Paqes së Trump, duke i dhënë fund më shumë se dy viteve të vuajtjeve dhe humbjeve. Ne mbështesim përpjekjet për një paqe të qëndrueshme, ku si palestinezët ashtu edhe izraelitët të jetojnë me siguri, dinjitet dhe të drejta të mbrojtura.”
Deklarata thekson nevojën për:
Zgjidhjen e mosmarrëveshjeve përmes diplomacisë, jo forcës;
Luftimin e ekstremizmit në çdo formë;
Respektimin e trashëgimisë fetare të krishterimit, islamit dhe judaizmit;
Sigurimin e barazisë dhe mundësive për çdo qytetar pa dallim feje, race apo etnie.
Liderët zotohen të zbatojnë marrëveshjen e re të paqes në Gaza dhe ta shndërrojnë atë në një “trashëgimi të përhershme për gjeneratat e ardhshme”.
Në terren, paqja mbetet e brishtë. Por diplomacia ndërkombëtare duket se është futur në një fazë të re – me Trump që kërkon të vulosë emrin e tij si arkitekt i fazës së re të Lindjes së Mesme./BBC
